"მე გზაში მქონდა საშუალება, რომ მენახა ეს ვიდეო. რა თქმა უნდა, კიდევ ერთხელ ვიმეორებ, ყველაფერს სჭირდება სრული გამჭვირვალობა, ჩაძიება და ყველაფერს სჭირდება ნახვა იმისათვის, რომ ბავშვთა უფლებები იყოს ხელშეუხებელი, დაცული და არავითარი რისკის ქვეშ არ იყოს", — ასე პასუხობს ქართული ოცნების თავმჯდომარე კითხვას, რას ფიქრობს მეუფე სპირიდონის მიერ გავრცელებულ ვიდეოზე. თუმცა, ის არ პასუხობს, დაირღვა თუ არა ბავშვების უფლებები ამ ვიდეოთი და ამბობს, რომ ამ კითხვებს მათ უნდა უპასუხონ, ვისი პრეროგატივაც არის.

"რა თქმა უნდა, მთავარი ამოცანა არის ამ შემთხვევაში გამჭვირვალობის უზრუნველოფა და ყველაფრის შესწავლა, რაც უკავშირდება იქ მიმდინარე მოვლენებს. არ შეიძლება წინასწარ დასკვნების გამოტანა, ვიდრე არ იქნება ყველაფერი შესწავლილი, გამოძიებული და მეორეს მხრივ, არის აუცილებელი, რომ სრული გამჭვირვალობა იყოს უზრუნველყოფილი. ამისათვის კონკრეტული ნაბიჯები იდგება", — განაცხადა მან რუსთავი 2-ის ეთერში.

კობახიძე ამბობს, რომ ამ საკითხზე მუსაობისას ეკლესიასთან თანამშრომლობა ძალიან მნიშვნელოვანია. მისივე თქმით, ბრალდება შესწავლილი უნდა იყოს და ამის შემდეგ შეიძლება "ვიღაცას დავაბრალოთ რაღაცა".

"ყველა უწყებას აქვს თავისი პასუხისმგებლობა და რა თქმა უნდა, მთავარია, რომ ეს პასუხისმგებლობა ყველა უწყებამ სათანადოდ გააცნობიეროს, ყველას უნდა ჰქონდეს საკუთარი სახელმწიფოებრივი ფუნქციების შესრულების საშუალება. აქ არის, რა თქმა უნდა, ეკლესიასთან თანამშრომლობა ძალიან მნიშვნელოვანი. კიდევ ერთხელ გავიმეორებ, თუ არის ბრალდება, ბრალდება უნდა იყოს შესწავლილი და ამის შემდეგ შეიძლება ვიღაცას დავაბრალოთ რაღაცა, ვიღაცას არ დავაბრალოთ რაღაცა. მთავარია, რომ ყველაფერი გამჭვირვალედ იყოს შესწავლილი", — განაცხადა მან.

იმის დასამტკიცებლად, რომ ბავშვებს ნინოწმინდის პანსიონიდან წასვლა არ სურთ, სხალთის ეპისკოპოსმა სპირიდონმა მათზე ფსიქოლოგიურად იძალადა, ვიდეოზე გადაიღო და გაავრცელა. სპირიდონის გავრცელებულ ვიდეოში ჩანს ბავშვის ტირილი, ასევე, იდენტიფიცირებულია რამდენიმე მათგანი როგორც ვიზუალურად, ასევე, სახელითა და გვარით. ამ ყველაფერს ესწრებიან, სავარაუდოდ, სოციალური მუშაკები, რომლებსაც, ვიდეოს მიხედვით, ფაქტზე რეაგირება არ აქვთ.

უფლებადამცველი ანა არგანაშვილი On.ge-სთან ამბობს, რომ ამ ვიდეოში ბავშვებზე ფსიქოლოგიური ძალადობა და მათი ნების კონტროლი ჩანს. იგი აკრიტიკებს სოციალური მუშაკების ქცევას და მიაჩნია, რომ სახელმწიფო ინსპექტორის აპარატმა ვიდეოს დაბლოკვა უნდა მოითხოვოს.

ამავე თემაზე:

• ომბუდსმენი მეუფე სპირიდონის გავრცელებულ ვიდეოებზე უწყებებს დაუყოვნებლივი რეაგირებისკენ მოუწოდებს
• სახალხო დამცველი ვიდეოებში მეუფე სპირიდონის ბავშვებთან კომუნიკაციას ფსიქოლოგიურ ძალადობად აფასებს
• კონფიდენციალობის დარღვევამ შესაძლოა გამოუსწორებელი ზიანი მიაყენოს ბავშვის ფსიქიკას — სახელმწიფო ინსპექტორი პანსიონის ვიდეოზე
• PHR-მა შსს-ს მეუფე სპირიდონისთვის შემაკავებელი ორდერის გამოცემაზე მიმართა
• კადრები შეიცავს მაიდენტიფიცირებელ ინფორმაციასა და ბავშვების უფლებების დარღვევას — სამინისტრო სპირიდონის ვიდეოზე