სახალხო დამცველი, ნინო ლომჯარია გავრცელებულ ვიდეოებში მეუფე სპირიდონის ბავშვებთან კომუნიკაციას ფსიქოლოგიურ ძალადობად აფასებს. ამის შესახებ მან ტელეკომპანია ფორმულას ეთერში ისაუბრა.

"ჩვენ, ფაქტობრივად, ყველა ვუყურებდით ბავშვებზე ფსიქოლოგიურ ძალადობასა და ზეწოლას პირდაპირ ეთერში. ის რაც ხდებოდა, იგივე მეუფე სპირიდონის კომუნიკაცია და ფორმა ბავშვებთან, არის ფსიქოლოგიური ძალადობა და ზეწოლა. ბავშვები განიცდიან უკიდურეს სტრესს ამის გამო, როცა პირდაპირ ეთერში, კამერების თვალწინ აყენებენ მძიმე ემოიცურ მდგომარეობაში. არ შეიძლება ბავშს ასეთი შეკითხვები ასეთ გარემოში დავუსვათ და დავაყენოთ ასეთი მძიმე სტრესის წინაშე", — თქვა ლომჯარიამ.

იმის დასამტკიცებლად, რომ ბავშვებს ნინოწმინდის პანსიონიდან წასვლა არ სურთ, სხალთის ეპისკოპოსი სპირიდონი მათზე ფსიქოლოგიურად ძალადობს, რასაც ვიდეოზე იღებს და ავრცელებს. სპირიდონის მიერ გავრცელებულ ვიდეოში ჩანს ბავშვის ტირილი, ასევე, იდენტიფიცირებულია რამდენიმე მათგანი როგორც ვიზუალურად, ასევე, სახელითა და გვარით. ამ ყველაფერს ესწრებიან, სავარაუდოდ, სოციალური მუშაკები, რომლებსაც, ვიდეოს მიხედვით, ფაქტზე რეაგირება არ აქვთ.

კადრში ჩანს, რომ მეუფე სპირიდონი ტელეფონით უკავშირდება ერთ-ერთი ბავშვის მშობელს და ეკითხება, სურს თუ არა, რომ მისი შვილი სოციალურმა მუშაკებმა წაიყვანონ. ოთახში, სადაც ეს საუბარი მიმდინარეობს, შემოჰყავთ ბავშვი, რომელიც ტირის. სასულიერო პირი მას ეკითხება, სურს თუ არა დედის გარდა სადმე წასვლა და საუბრის გადაღებას ითხოვს, პარალელურად კი, სავარაუდოდ, მშობელს ესაუბრება.

აღნიშნულს სახელმწიფო ინსპექტორი გამოეხმაურა. მისი თქმით, განცხადებით, ბავშვთა სახლის ბენეფიციარების კონფიდენციალობის დაღვევამ შესაძლოა გამოუსწორებელი ზიანი მიაყენოს ბავშვის ფსიქიკას.