ბელარუსის სახელმწიფო ტელეარხ ONT-ზე ოპოზიციური ტელეგრამარხის, ნექსთან ყოფილი რედაქტორის, რომან პროტასევიჩი ინტერვიუ გავიდა. პროტასევიჩი იმეორებს, რომ გამოძიებასთან თანამშრომლობს და აღიარებით ჩვენებას აძლევს.

პროტასევიჩი მინსკში მას შემდეგ დააკავეს, რაც ათენიდან ვილნიუსში მიმავალი სამგზავრო თვითმფრინავი იძულებით დასვეს იმ საბაბით, რომ თითქოს ბორტზე ასაფეთქებელი ნივთიერება იყო. პროტასევიჩი ბელარუსში მასობრივი არეულობის ორგანიზებაშია ბრალდებული. დაკავებულის მამას მიაჩნია, რომ რომან პროტასევიჩმა ინტერვიუ წამების ზეგავლენით მისცა.

აღნიშნული ინტერვიუ 3 ივნისს გადაცემაში მარკოვი. არაფერი პირადული გავიდა. როგორც BBC-ის რუსული ბიურო წერს, წამყვანი, რომელიც ამავე დროს არხის ხელმძღვანელიცაა, გადაცემაში მთავრობის მიმართ ლოიალურ პოლიტიკოსებს, სასულიერო პირებსა და ექსპერტებს იწვევს.

გარდა იმისა, რომ პროტასევიჩმა ბრალი აღიარა, ინტერვიუს დროს მან განაცხადა, რომ ბელარუსი ოპოზიციონერებით იმედგაცრუებულია და სურს, შეწყვიტოს პოლიტიკური საქმიანობა. მან თქვა, რომ პატივს სცემს ალექსანდრ ლუკაშენკოს, ხოლო სვეტლანა ტიხანოვსკაიას შტაბის წევრები და საკოორდინაციო საბჭოს წევრები გააკრიტიკა.

სამთავრობო არხისთვის მიცემულ ინტერვიუში პროტასევიჩმა თქვა, რომ მინსკში Ryanair-ს თვითმფრინავის დაშვების უკან, დანილ ბოგდანოვიჩი დგას, რომელიც სვეტლანა ტიხანოვსკაიას გარემოცვაშია. იგი ამბობს, რომ ბოგდანოვიჩთან კონფლიქტი ჰქონდა.

ეთერის დასრულების შემდეგ რომან პროტასევიჩის მამამ, დმიტრი პროტასევიჩმა აღნიშნა, რომ ეს ინტერვიუ "ერთკვირიანი წამების შედეგია" და არ გამორიცხავს, რომ მისი შვილი ფსიქოტროპული პრეპარატების ზემოქმედების ქვეშ ყოფილიყო.