ნაციონალური მოძრაობის წევრის, რომან გოცირიძის განცხადებით, ის არ ეთანხმება ექსპრეზიდენტის, მიხეილ სააკაშვილის პოზიციას, რომ საქართველოს აქვს შანსი, იყოს ენერგოდამოუკიდებელი ჰესების გარეშე. გოცირიძის თქმით, საქართველოს ჰესები სჭირდება იმისთვის, რომ განვითარდეს. ამაზე მან პალიტრანიუსის ეთერში ისაუბრა.

"ჰესების ერთ-ერთი კონტექსტი იყო, რომ მოდი, სახელმწიფომ ააშენოს, მაგრამ რას ნიშნავს, იცით, სახელმწიფომ ააშენოს და უცხოურმა ინვესტრომა არ ააშენოს, თუ უფრო დავკონკრეტდებით, "მუსლიმმა ინვესტორმა არ ააშენოს" და უფრო თუ დავკონკრეტდებით "თურქმა ინვესტორმა არ ააშენოს" — ყველანაირად მავნებლურია ეს თეზისი. ამიტომ ამ მოძრაობას, ერთი მხრივ, ვუთანაგრძნობ და ასე ვთქვათ, სწორი არის როდესაც ამხელენ ხელისუფლების არასწორ ქმედებას, კორუფციულ ინტერესებს ამ პროექტში, არასაჯაროობას და არასათანადო მომზადებას ასეთი დიდი პროექტებისა, მაგრამ მეორე მხრივ, ვერასდროს ვერ დავუჭერ ისეთ ლოზუნგს მხარს, როგორიცაა "არა ჰესებს". არა ჰესებს ნიშნავს, არა საქართველოს განვითარებას. ეს არის ჩვენი სიმდიდრე, ჩვენ მეტი არაფერი არა გვაქვს", — თქვა მან.

დღეს, 28 მაისს მიხეილ სააკაშვილმა საკუთარ ფეისბუქზე გაავრცელა ვიდეო, სადაც ამბობს, რომ საქართველოს შეუძლია, იყოს ენერგოდამოუკიდებელი ჰესების გარეშეც.

"ახლა ვიმყოფები ამსტერდამში მიმავალ თვითმფრინავში და ზღვაში არის გაკეთებული ქარის ელექტროძრავები, ელექტროსადგურები. ამას იმიტომ ვამბობ, როდესაც ვლაპარაკობ ნამახვანზე, რომ როცა ნამახვანი და ჰიდროჰესები შენდებოდა, მაშინ არ იყო ეს ტექნოლოგიები, არ იყო მზის ასეთი ტექნოლოგიები, არ იყო ქარის ასეთი ტექნოლოგიები, არ იყო წყალბადის ტექნოლოგიები, ახლა ყველაფერი არსებობს. ასე რომ, საქართველოს აქვს შანსი, იყოს ენერგოდამოუკიდებელი ჰესების, დიდი ჰესების გარეშეც ამ ეტაპზე", — თქვა სააკაშვილმა.

ნამახვანჰესის წინააღმდეგ აქციები გრძელდება. 28 მაისს გუმათში დაპირისპირებისას 8 პირი დააკავეს, რომლებიც უკვე გატავისუფლებულები არიან. მათი სასამართლო პროცესი გადაიდო და 4 ივნისს ჩაინიშნა.

გუმათში სიტუაცია მას შემდეგ დაიძაბა, რაც აქციის მონაწილეების ნაწილმა რკინის ჯებირებზე ბრახუნი დაიწყო, ნაწილმა კი სცადა ჯებირებზე მიწოლა. უკან დახევაზე ორგანიზატორების მოწოდების მიუხედვად, ყველას გაკონტროლება ვერ მოხერხდა და სიტუაცია დაიძაბა.

26 მაისს, გვიან ღამით ნამახვანჰესის მოწინააღმდეგე აქტივისტები გუმათში ჩავიდნენ და კომპანია ენკას მანქანებისთვის ხეობის შესასვლელი გადაკეტეს. ისინი აბრახუნებდნენ რკინის ჯებირზე, რომელიც პოლიციამ გზის გადასაკეტად აღმართა. გუმათჰესთან მთელი ღამის განმავლობაში მობილიზებული იყო პოლიციაც.

შინაგან საქმეთა სამინისტრომ 27 მაისს განაცხადა, რომ ბარიკადების დაზიანებაზე გამოძიება დაიწყეს. აქტვისიტებმა კი აღნიშნეს, რომ ხმაური გაგრძელდება იქამდე, სანამ მოთხოვნები არ შესრულდება.