შინაგან საქმეთა სამინისტროს ცნობით, სოფელ გუმათში ბარიკადების დაიზანებაზე გამოძიება დაიწყეს. მათი განცხადებით, დაზიანებულია პოლიციის მიერ გუმათჰესთან უსაფრთხოების მიზნით განთავსებული რკინის ჯებირები.

"ნამახვანჰესის მშენებლობის მოწინააღმდეგეებმა გუშინ თბილისიდან რიონის ხეობაში გადაინაცვლეს და გუმათში განაგრძეს საპროტესტო აქცია. შეკრებილები მთელი ღამის განმავლობაში პოლიციის უსაფრთხოების ჯებირებს ქვებს და სხვადასხვა საგნებს ურტყამდნენ. სამინისტრო დეტალურად სწავლობს კანონდარღვევის ფაქტს და შესაბამისი სამართლებრივი რეაგირება მოჰყვება", — აცხადებენ უწყებაში.

მათივე ინფორმაციით, გამოძიება სისხლის სამართლის კოდექსის 187-ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.

26 მაისს, გვიან ღამით ნამახვანჰესის მოწინააღმდეგე აქტივისტები გუმათში ჩავიდნენ და კომპანია ენკას მანქანებისთვის ხეობის შესასვლელი გადაკეტეს. გუმათჰესთან მთელი ღამის განმავლობაში მობილიზებული იყო პოლიციაც. ნამახვანჰესის მოწინააღმდეგეები გუმათში თბილისში გამართული ოთხდღიანი აქციების შემდეგ დაბრუნდნენ.