ეკონომიკის მინისტრის, ნათია თურნავას განცხადებით, არ შეიძლება, კაშხლების მდგრდადობაზე "მეგაფონებით" იმსჯელონ. ნამახვანჰესის მოწინააღმდეგე აქციებზე მან ჟურნალისტებთან ისაუბრა.

"მზად ვართ, რომ ვიმუშავოთ რიონის ხეობის მცველებთან, აქტივისტებთან იმაზე, რომ პროექტი იყოს საბოლოოდ ისეთი, რომ არანაირ კითხვას აღარ იწვევს. ამისთვის ჩვენ ორი ძალიან კარგი პლატფორმა შევთავაზეთ, ერთი ეს არის ევროკავშირის ჩართულობით და მეორე — ექსპერტთა საბჭოს შექმნით. ასეთი საკითხები წყდება ექსპერტების ჩართულობით. არ შეიძლება, სეისმიკაზე, მიწისძვრებზე, კაშხლების მდგრადობაზე ვიმსჯელოთ მეგაფონებით და აქციების დროს", — თქვა მინისტრმა.

ნამახვანჰესის კასკადის მშენებლობის წინააღმდეგ პროტესტმა რიონის ხეობიდან თბილისში 23 მაისს გადაინაცვლა. რამდენიმე დღის განმავლობაში აქციის მონაწილეები პერიოდულად გზას კეტავდნენ და მოძრაობას აჩერებდნენ. დღეს, 26 მაისს აქტივისტები ხეობაში ბრუნდებიან და აცხადებენ, რომ კომპანია ENKA-ს მშენებლობაში ხელს ადგილიდან შეუშლიან.