საფრანგეთის პრეზიდენტობის კანდიდატის, მარი ლე პენის ყოფილი თანაშემწე ახალ ინფორმაციას აქვეყნებს პარტიის ფინანსების თაღლითურ სქემებზე.

გაელ ნოფრის განცხადებით, 2012 წელს ეროვნულმა ფრონტმა ის ლე პენის საპრეზიდენტო კამპანიის ჯგუფში მიიღო და ევროპარლამენტის ყალბი კონტრაქტი გამოიყენა. ინფორმაციას BBC ავრცელებს.

მისი თქმით, ამით პარტიამ თავიდან აირიდა კამპანიის დანახარჯის სრულყოფილი დეკლარირება.

ამ დროისთვის, სხვა გამოძიებაც მიმდინარეობს ეროვნული ფრონტის წინააღმდეგ, რომელიც ევროპარლამენტის დაფინანსების არამიზნობრივად დახარჯვას უკავშირდება.

საფრანგეთის საპრეზიდენტო არჩევნები 23 აპრილს იმართება. წინასწარი გამოკითხვებით, კანდიდატებს შორის ლე პენი ლიდერობს და ის პირველ ტურს გადალახავს, თუმცა ცენტრისტმა ემანუელ მაკრონმა მეორე ტურში ის შესაძლოა დაამარცხოს.