ამნისტიის შესახებ კანონპროექტს დღეს კენჭს აღარ უყრიან. ამის შესახებ პარტიების ლიდერებმა პარლამენტის თავმჯდომარესთან შეხვედრის შემდეგ განაცხადეს.

ანრი ოხანაშვილის თქმით, არ არის პანაცეა, რომ ეს საკითხი დღეს გავიდეს, მაგრამ აუცილებლად იქნება განხილული მიმდინარე კვირაში, სავარაუდოდ, ხუთშაბათს.

"ხუთშაბათს შევიკრიბებით, ვიმსჯელებთ. ჩვენ გვაქვს მყარი არგუმენტები. ოპოზიცია თვლის, რომ მათ აქვთ მოსაზრებები და სურთ, რომ ამ მოსაზრებებთან დაკავშირებით კიდევ ერთხელ დავფიქრდეთ. რა თქმა უნდა, მაშინ, როდესაც ჩვენ ამ დოკუმენტს მოვაწერეთ ხელი, ეს პასუხისმგებლობა ძალიან კარგად გვაქვს გაცნობიერებული, რომ უნდა ვითანამშრომლოთ პოლიტიკურად, რაც არ უნდა არ ვეთანხმებოდეთ მათ", — განაცხადა ოხანაშვილმა.

პარტა მოქალაქეების ლიდერმა, ლევან იოსელიანმა კი აღნიშნა, რომ შეთანხმებამდე მისვლის რესურსი არსებობს.

"არსებობს იმის რესურსი, რომ მივიდეთ შეთანხმებამდე და რაღაცნაირად მოვახერხოთ, რომ როგორც დღეს, საარჩევნო კოდექსს სავარაუდოდ ყველა დავუჭერთ მხარს, ასე ამნისტიაზეც ერთობლივი დოკუმენტი შევიმუშაოთ, ერთობლივი ფორმულირება. ეს არის შარლ მიშელის დოკუმენტის გაგრძელება", — თქვა იოსელიანმა.

მისივე ინფორმაციით, შეხვედრას პარლამენტში მყოფი ყველა ოპოზიციური პარტიის წარმომადგენელი ესწრებოდა.

ლელოს ერთ-ერთ ლიდერს, ბადრი ჯაფარიძეს ჟურნალისტებმა ჰკითხეს, რამდენად მოახერხებენ საერთო დოკუმენტის მიღებას. კითხვას დეპუტატმა ასე უპასუხა:

"ძალიან რთული კითხვაა. ჩვენ უნდა შევეცადოთ, რომ შევთანხმდეთ. თუ ვერ შევთანხმდებით, ესეც შეთანხმებაა, რომ ვერ ვთანხმდებით".

აღსანიშნავია, რომ ორივე მხარე თავისი "მყარი" არგუმენტების შესახებ საუბრობს.

დღეს ბიუროს სხდომაზე ოპოზიციამ დააყენა ინიციატივა, გამომდინარე კანონპროექტისადმი განსხვავებული მოსაზრებებიდან, განხილვა დაჩქარებული არ ყოფილიყო. საპასუხოდ, კუჭავამ თქვა, რომ პოზიციების დაახლოების მიზნით მხარეებს შეხვდებოდა.

მორიგი სამუშაო შეხვედრა ხუთშაბათს, 27 მაისს გაიმართება.

ამნისტიის შესახებ კანონპროექტები პირველი მოსმენით პარლამენტს დღეს, 25 მაისს უნდა განეხილა.

პარლამენტში ამნისტიის შესახებ ორი კანონპროექტია დარეგისტრირებული — ერთი ოპოზიციის და ერთიც მმართველი პარტიის.

20 ივნისთან დაკავშირებულ საქმეებზე ამნისტიის მიღება ევროპული საბჭოს პრეზიდენტის, შარლ მიშელის ინიციატივით შემქნილი დოკუმენტის ერთ-ერთი პუნქტი იყო.