გერმანიის ქრისტიან-დემოკრატიული კავშირისა და ბავარიის ქრისტიან-სოციალური კავშირის (CDU/CSU) ბლოკის ლიდერმა ფრიდრიხ მერცმა გერმანიის კანცლერად ასარჩევად საჭირო ხმების რაოდენობა ვერ მიიღო.

ბუნდესტაგში კენჭისყრის პირველ ტურში მერცმა 310 ხმა მიიღო. კანცლერობისთვის კი 316 ხმა სჭირდებოდა.

ბუნდესტაგს კანცლერის არჩევა კენჭისყრიდან 14 დღის განმავლობაში შეუძლია. კანდიდატმა გამარჯვებისთვის 316 ხმა უნდა მიიღოს.

თუ მერცი (ან სხვა ნებისმიერი პირი) ამ ორკვირიან პერიოდში ამას ვერ შეძლებს, მაშინ კიდევ ერთი, საბოლოო კენჭისყრა გაიმართება. თუ ამ კენჭისყრაში 316 ხმას ვერავინ მიიღებს, მაშინ გერმანიის პრეზიდენტი ფრანკ-ვალტერ შტაინმაიერი ჩაერთვება საქმეში. მას შეუძლია კანცლერად დანიშნოს ის პირი, რომელმაც საბოლოო კენჭისყრაში ყველაზე მეტი ხმა მიიღო, ან დაითხოვოს ბუნდესტაგი და დანიშნოს ახალი არჩევნები.

Reuters-ის ცნობით, ბუნდესტაგმა შესაძლოა შემდეგი კენჭისყრა 7 მაისს გამართოს.

2025 წლის თებერვლის ბოლოს ჩატარებული ვადამდელი საპარლამენტო არჩევნების შემდეგ, რომლის შედეგადაც კონსერვატიულმა CDU/CSU-მ (ქრისტიან-დემოკრატიული კავშირი/ქრისტიან-სოციალური კავშირი) ბლოკმა პირველი ადგილი დაიკავა, 69 წლის ფრიდრიხ მერცს გერმანიის მომავალი კანცლერი უწოდეს.