საქართველოს პრეზიდენტი გიორგი მარგველაშვილი მიგრაციის, საშინაო საქმეთა და მოქალაქეობის საკითხებში ევროკომისარ დიმიტრის ავრამოპულოსს შეხვდა, რომელიც საქართველოში ვიზიტით იმყოფება.

პრეზიდენტის ადმინისტრაციის ცნობით, ევროკომისარმა დიმიტრის ავრამოპულოსმა განაცხადა, რომ ქვეყნის პრეზიდენტთან უმნიშვნელოვანესი დისკუსია გაიმართა საქართველოს ევროპულ პერსპექტივებზე. მისივე თქმით, საქართველო ევროპულ გზაზე მარტო არ არის და მალე შემუშავდება პოზიცია საქართველოს ევროპულ მომავალზე:

"მე მუდმივად აღვნიშნავდი და პრეზიდენტთან შეხვედრისას დღესაც გავიმეორე, რომ ჩვენ საქართველოს განვიხილავთ როგორც მოწინავე ქვეყანას ფართო, ევროპულ სივრცეში. დარწმუნებული ვარ, რომ ყველა წამოწყების და ქვეყანაში განხორციელებული რეფორმის გათვალისწინებით, ჩვენ ძალიან მალე შევიმუშავებთ პოზიციას საქართველოს ევროპულ პერსპექტივაზე. შესაბამისად, საქართველო ევროპულ გზაზე მარტო არ არის. ჩვენ მის გვერდით ვდგავართ და გვჯერა, რომ მალე ვიზეიმებთ ამ დიდებულ მომენტს ქართველ მეგობრებთან."

შეხვედრას ესწრებოდნენ საქართველოს პრეზიდენტის ადმინისტრაციის უფროსი გიორგი აბაშიშვილი, ეროვნული უშიშროების საბჭოს მდივანი დავით რაქვიაშვილი, პრეზიდენტის მრჩეველი სოფიო შამანიდი.