აშშ-ს ელჩის საქართველოში, კელი დეგნანის განცხადებით, იუსტიციის უმაღლესი საბჭოს წევრებისა და უზენაესი სასამართლოს მოსამართლეების დანიშვნის პროცესების გაგრძელება 19 აპრილის შეთანხმების სულისკვეთებას არ შეესაბამება. მისი თქმით, ეს ცვლილებები უნდა განხროციელდეს ახალი, რეფორმირებული სისტემის ფარგლებში, რომელიც ყველა მხარის ინკლუზიური დებატების შემდეგ მიიღწევა.

"19 აპრილის შეთანხმება, რომელსაც პოლიტიკურმა ლიდერებმა მოლაპარაკებების შედეგად მიაღწიეს, გულისხმობს სასამართლო სისტემის გაუმჯობესებასა და დამოუკიდებლობას. ეს არის პროცესი, რომელიც დროს მოითხოვს. საქართველო ამისთვის ბოლო 20 წელია მუშაობს და ჯერ კიდევ ბევრია სამუშაო. აშშ მზად არის, მხარი დაუჭიროს საქართველოს ძალისხმევას, გააძლიეროს სასამართლო და გახადოს უფრო დამოუკიდებელი", — თქვა დეგნანმა პარლამენტში.

22 მაისს საქართველოში აკრედიტებულმა დიპლომატებმა, ევროკავშირის ელჩმა, კარლ ჰარცელმა, აშშ-ის ელჩმა, კელი დეგნანმა და ევროპის საბჭოს აპარატის უფროსმა, ნატალია ვუტოვამ პარლამენტის თავმჯდომარეს წერილი მისწერეს და შეთანხმებით აღებული პასუხისმგებლობები და ვალდებულებები შეახსენეს.

კერძოდ, დიპლომატები აღნიშნავენ, რომ უზენაეს სასამართლოში მოსამართლეების და იუსტიციის უმაღლესი საბჭოს წევრების დანიშვნის პროცესი დაუყოვნებლივ უნდა შეჩერდეს. მათი განცხადებით, ეს აჩვენებს ნამდვილ ერთგულებას მართლმსაჯულების გამჭვირვალობასა და მის მიმართ ნდობის გაზრდის საქმეში.