სახელმწიფო ინსპექტორის სამსახურმა კულტურის მინისტრს, თეა წულუკიანს მთავარი არხის დირექტორის, ნიკა გვარამიას ნომრის გასაჯაროებაზე ადმინისტრაციული პასუხისმგებლობა არ დააკისრა. ამასთან, ინსპექტორის სამსახურის განცხადებით, წულუკიანის მიერ პარლამენტის სხდომაზე, დებატების დროს, გაკეთებული განცხადება იყო ცალსახად არასაჭირო მიმდინარე დებატების კონტექსტში. სახელმწიფო ინსპექტორის სამსახურში აცხადებენ, რომ გადაწყვეტილება ადამიანის უფლებათა ევროპული სასამართლოს პრაქტიკას და ვენეციის კომისიის მოსაზრებებზეა დაფუძნებული.

"იმის გათვალისწინებით, რომ პარლამენტის წევრი სარგებლობს იმუნიტეტით და მას უფლებამოსილების განხორციელებისას მინიჭებული აქვს გამოხატვის თავისუფლების ფართო ფარგლები, მისი მხრიდან სადეპუტატო საქმიანობის ფარგლებში პერსონალურ მონაცემთა გასაჯაროება ვერ გახდება საპარლამენტო იმუნიტეტის შეზღუდვის საფუძველი. პარლამენტის წევრებისთვის საპარლამენტო იმუნიტეტის მინიჭების მიზანი არის ის, რომ მათ მიეცეთ მნიშვნელოვან დებატებში მონაწილეობის მიღების საშუალება მათზე დაკვირვებების, შეზღუდვების ან მოსაზრებების რედაქტირების, ასევე, სასამართლოს ან სხვა ამგვარი ორგანოს წინაშე წარდგენის საშიშროების გარეშე. იმუნიტეტი, პარლამენტარისთვის "გარე პირის" (ხელისუფლების სხვა შტოს) მიერ პასუხისმგებლობის დაკისრებისგან დაცვის გარანტიაა და პარლამენტარს მის მიერ გამოთქმული აზრებისა და შეხედულებების გამო, პოტენციურად გაუთავებელი სამართლებრივი დავებისაგან იცავს. ამგვარ დავებს, შეუძლიათ შეზღუდონ პარლამენტარების მიერ საკუთარი შეხედულებების გამოხატვის თავისუფლება იმდენად, რომ ეჭვის ქვეშ დადგეს სადეპუტატო მანდატის ეფექტურად გამოყენების შესაძლებლობა. ზემოაღნიშნულიდან გამომდინარე, სახელმწიფო ინსპექტორმა თეა წულუკიანს ადმინისტრაციული პასუხისმგებლობა არ დააკისრა", — აცხადებს სახელმწიფო ინსპექტორის სამსახური.

რაც შეეხება, ჟურნალისტების ნანუკა ჟორჟოლიანისა და ელისო კილაძის მიერ თეა წულუკიანის ტელეფონის ნომრის გასაჯაროების ფაქტს, სახელმწიუფო ინსპექტორის თანახმად, შემოწმებით დადგინდა, რომ მათ ტელეფონის ნომერი ჟურნალისტური საქმიანობის ფარგლებში მოიპოვეს.

"სიტყვისა და გამოხატვის თავისუფლების შესახებ" საქართველოს კანონით დაცულია ჟურნალისტის პროფესიული საიდუმლოება. რაც შეეხება ტელეფონის ნომრის გასაჯაროებას, მათი განმარტებით თეა წულუკიანი არის პოლიტიკური თანამდებობის პირი და იგი ანგარიშვალდებულია მოსახლეობის წინაშე. მოქალაქეებს უფლება აქვთ იცოდნენ მისი ტელეფონის ნომერი, რათა დაუკავშირდნენ სხვადასხვა საკითხზე. შესაბამისად, თეა წულუკიანის ტელეფონის ნომრის გასაჯაროვების მიზნად მათ მიუთითეს საზოგადოების ინფორმირება", — წერია ინსპექტორის სამსახურის მიერ გავრცელებულ განცხადებაში.

2021 წლის 2 თებერვალს საქართველოს პარლამენტის პლენარულ სხდომაზე, განათლების, მეცნიერებისა და კულტურის კომიტეტის თავმჯდომარემ, თეა წულუკიანმა, საპარლამენტო დებატების დროს, საჯაროდ გააჟღერა მთავარი არხის გენერალური დირექტორის, ნიკა გვარამიას ტელეფონის ნომერი. ამის შემდეგ, ამავე დღეს, ფეისბუქის საშუალებით ჟურნალისტებმა ელისო კილაძემ და ნანუკა ჟორჟოლიანმა გაასაჯაროვეს თეა წულუკიანის მობილური ნომერი.

სახელმწიფო ინსექტორის სამსახურში აცხადებენ, რომ შემოწმების ფარგლებში, სამსახურის მიერ თეა წულუკიანს, ელისო კილაძეს და ნანა ჟორჟოლიანს ეთხოვათ ინფორმაციის წარმოდგენა როდის, რა გზით და რა მიზნით მოიპოვეს მათ მიერ გასაჯაროებული ტელეფონის ნომრები და ასევე, რომელი სამართლებრივი საფუძვლითა და მიზნით გაასაჯაროვეს ისინი. ელისო კილაძემ და ნანუკა ჟორჟოლიანმა სამსახურს მოთხოვნილი ინფორმაცია წარუდგინა, ხოლო თეა წულუკიანმა სამსახურს ინფორმაცია არ მოაწოდა.