საქართველოს ბანკმა პანდემიის პერიოდში განათლების მხარდასაჭერად განხორციელებული პროექტებისთვის საქართველოს პასუხისმგებელი ბიზნეს კონკურსის — Meliora 2021- ის ჯილდო მოიპოვა.

ამ კატეგორიაში ჯილდო გადაეცემათ კომპანიებს, რომლებიც მოსახლეობის გარკვეულ ჯგუფებსა და მთლიანად საზოგადოებას ეხმარებიან COVID-19-ის კრიზისთან გამკლავებაში.

კორპორაციული სოციალური პასუხისმგებლობის ფარგლებში საქართველოს ბანკის უცვლელ პრიორიტეტად რჩება განათლების ხელშეწყობა. ამ მიზნით ბანკმა არაერთი პროექტი განახორციელა. მათ შორის charte.ge-ს მხარდაჭერა, Zoom Education, წიგნის თარო. სწორედ ამ პროექტების მხარდაჭერისა და განხორციელებისთვის, ბანკმა მოიპოვა ჯილდო კატეგორიაში "განათლების მხარდაჭერა ონლაინ სწავლების პერიოდში".

პანდემიის პერიოდში საქართველოს ბანკის მიერ განხორციელებული პროექტების ფარგლებში 300 სოციალურად დაუცველ მოსწავლეს, რომლებსაც არ ქონდათ ინტერნეტი, Charte.ge-სთან ერთად ინტერნეტზე წვდომის შესაძლებლობა მიეცა. ბანკმა მათ მთელი წლის ინტერნეტის საფასური დაუფარა. შედეგად, ახალგაზრდებმა შეძლეს სწავლის პროცესის ონლაინ რეჟიმში გაგრძელება.

საქართველოს ბანკის ინიციატივით, ივანე ჯავახიშვილის სახელობის თბილისის სახელმწიფო უნივერსიტეტში ონლაინ ლექციების შეუფერხებლად ჩატარების მიზნით, ბანკმა Zoom Education-ის ლიცენზია შეიძინა და გადასცა უნივერსიტეტს. შედეგად, ამ ეტაპზე უკვე ჩატარებულია 68 912 შეხვედრა (ლექცია, სემინარი, ვორქშოფი).

პანდემიის დროს, საგანმანათლებლო პროცესის ხელშეწყობის მიზნით, საქართველოს ბანკმა წიგნის თაროსთან თანამშრომლობით არაფორმალური განათლების ონლაინ სკოლა შექმნა. პროექტი იზოლაციის პერიოდში დაწყებითი კლასების მოსწავლეებს უფასო, დამატებით, კლასგარეშე გაკვეთილებს სთავაზობს. წიგნის თაროს ონლაინ სკოლა სამ სეზონად დაიყო და ის ახლაც გრძელდება. მასში 1 383 მოსწავლე აქტიურად არის ჩართული.

ჯამში, პანდემიის დროს, საქართველოს ბანკის მიერ დისტანციური განათლების ხელშეწყობის მიზნით განხორციელებული პროექტებით უკვე 25 000-მდე სტუდენტმა და მოსწავლემ ისარგებლა.

საქართველოს ბანკის მიერ კორპორაციული სოციალური პასუხისმგებლობის ფარგლებში განხორციელებულ პროექტებზე ინფორმაცია ხელმისაწვდომია ამ ბმულზე.

Meliora საქართველოს სტრატეგიული კვლევებისა და განვითარების ცენტრის (CSRDG) ორგანიზებით, ევროკავშირისა და კონრად ადენაუერის ფონდის (KAS) მხარდაჭერით, ყოველწლიურად იმართება.