20 წლის ასადი ასკეროვი, ქუთაისში ცხოვრობს მშობლებთან ერთად. 6 წლის იყო, როდესაც ის შეზღუდული შესაძლებლობის მქონე პირთა დღის ცენტრში პირველად მოხვდა. მისი პირველადი საჭიროება ფსიქო-სოციალური რეაბილიტაცია იყო.

წლების განმავლობაში ასადი ცდილობდა თავისი საყოფაცხოვრებო, აკადემიური და სოციალური უნარების განვითარებას.

ასადმა ამ დროის განმავლობაში მიიღო უდიდესი გამოცდილება, უნარ-ჩვევები და ცოდნა, რამაც საშუალება მისცა მარტივად ეპოვა სამსახური და ყოფილიყო დასაქმებული.

"სამი თვე სტაჟირებაზე ვიყავი, ხელობას ვსწავლობდი, მერე მიმიღეს სამუშაოზე და მიმამაგრეს ოსტატს", — ამბობს ასადი.

ასადის თქმით, თავისი და ოჯახის ცხოვრება სრულიად შეიცვალა, რაც მუშაობა დაიწყო. იგი არ არის მხოლოდ მშობლებზე დამოკიდებული, საკუთარი შემოსავალი აქვს და რემონტის გაკეთებაშიც კი ეხმარება მათ.

"სანამ მუშაობას დავიწყებდი, სხვანაირი ბავშვი ვიყავი, ახლა ვარ თავდაჯერებული, მეგობრები ყოველთვის კარგს ამბობენ ჩემზე",— აღნიშნავს ასადი.

კამპანიის #მომავალიშენზეა ფარგლებში, გვსურს ასადის მსგავსი ისტორიები გაგიზიაროთ, რათა გახანოთ, რომ ბევრი რამის შეცვლა შეიძლება, როდესაც საზოგადოება მონაწილეობს გადაწყვეტილების მიღების პროცესში ადგილობრივ მთავრობასთან ერთად.

პროექტი "პარტნიორობა ჩართულობითი პოლიტიკის შესაქმნელად" დაფინანსებულია ევროკავშირის მიერ (European Union in Georgia) და მას ახორციელებს ASB საქართველო, პარტნიორ ორგანიზაციებთან CHCA და Kakheti Regional Development Foundation (KRDF) ერთად.