უეს ანდერსონი ამ ზაფხულს ესპანეთს ეწვევა, რათა გულშემატკივრები კიდევ ერთი ულამაზესი ფილმით გაახაროს. ამის შესახებ ინფორმაცია El Pais-მა გაავრცელა, რომლის მიხედვითაც, გადაღებები ესპანეთის ქალაქ ჩინჩონში ივლისში, აგვისტოსა და სექტემბერში გაგრძელდება.

ქალაქის მერმა, ფრანცისკო ხავიერ მარტინეზმა TV6 News-სთან განაცხადა, რომ ფილმის გადაღება ქალაქისთვის უმნიშველოვანესი შესაძლებლობა იქნება. მიუხედავად იმისა, რომ ფილმის სახელი, მსახიობები და შინაარსთან დაკავშირებული დეტალები ჯერ ცნობილი არაა, ქალაქში გადასაღები მოედანი უკვე მზადდება.

აღსანიშნავია, რომ შარშან უეს ანდერსონი ახალი რომანტიკული ფილმის გადაღებას რომში გეგმავდა. როგორც ჩანს, მისი გეგმები შეიცვალა.

მანამ, სანამ უეს ანდერსონის ახალი ფილმის შესახებ მეტ დეტალს შევიტყობთ, გულშემატკივრები რეჟისორის ბოლო ფილმს — The French Dispatch-ს ელიან, რომლის პრემიერაც წელს ივლისში, კანის კინოფესტივალზე შედგება. ფილმში ისეთ ვარსკვლავებს ვიხილავთ, როგორებიც არიან ბენისიო დელ ტორო, ტიმოთი შალამე, ტილდა სუინტონი, ედრიენ ბროუდი და სხვ.

ამავე თემაზე: