საქართველოს ვიცე პრემიერი და საგარეო საქმეთა მინისტრი, დავით ზალკალიანი ოფიციალური ვიზიტით უკრაინას პირველად ეწვევა. ის კიევში 16-17 მაისში ჩავა, სადაც გაიმართება ორმხრივი შეხვედრები უკრაინის საკანონმდებლო და აღმასრულებელი ხელისუფლების წარმომადგენლებთან. ინფორმაციას ამის შესახებ საგარეო საქმეთა სამინიტრო ავრცელებს.

"ოფიციალური ვიზიტის ფარგლებში საუბარი შეეხება საქართველო-უკრაინის სტრატეგიულ პარტნიორობას, თანამშრომლობის სხვადასხვა მიმართულებებს და ურთიერთობების შემდგომი გაღრმავების პერსპექტივებს", — ნათქვამია უწყების განცხადებაში.

მათივე ინფორმაციით, კიევში ვიზიტის ფარგლებში ზალკალიანი მონაწილეობას მიიღებს სამი ასოცირებული ქვეყნის — მოლდოვას, საქართველოსა და უკრაინის საგარეო საქმეთა მინისტრების შეხვედრაში, სადაც სამინისტროს ცნობით, მინისტრები განიხილავენ სამი ქვეყნის შემდგომი მჭიდრო თანამშრომლობის საკითხებს ევროკავშირთან პოლიტიკური დიალოგის, ეკონომიკური და სექტორული ინტეგრაციის გასაძლიერებლად, აღმოსავლეთ პარტნიორობის მომავალი სამიტისთვის სამზადისს, ასევე, იმსჯელებენ რეგიონში არსებული უსაფრთხოების გარემოსა და გამოწვევებზე.