საქართველოში საწვავის ღირებულება ისტორიულ მაქსიმუმზეა — ამას ბენზინ-გასამართ სადგურებზე არსებული ფასები აჩვენებს.

On.ge-მ სამი ბრენდირებული ნავთობკომპანიის (ვისოლი, გალფი, სოკარი) მიერ დაწესებული ფასები შეისწავლა და სხვადასხვა სახის საწვავის საშუალო ღირებულება დაადგინა. აღმოჩნდა, რომ როგორც სუპერის, ასევე რეგულარისა და პრემიუმის ხარისხის საწვავზე ფასები რეკორდულად გაზრდილია.

მიმდინარე წლის 12 მაისის მდგომარეობით, სამი ბრენდირებული კომპანიის მონაცემებზე დაყრდნობით, საწვავზე ფასების საშუალო ღირებულება ამგვარია:

• სუპერი — 3,01 ლარი. ფასის ზრდა გასული წლის შესაბამის პერიოდთან — საშუალოდ, 67 თეთრი;
• პრემიუმი — 2,95 ლარი. ფასის ზრდა გასული წლის შესაბამის პერიოდთან — საშუალოდ, 75 თეთრი;
• რეგულარი — 2,85 ლარი. ფასის ზრდა გასული წლის შესაბამის პერიოდთან — საშუალოდ, 75 თეთრი;

ქვეყანაში საწვავზე ფასების ზრდაზე სამი ძირითადი ფაქტორი მოქმედებს: საერთაშორისო ფასები, ეროვნული ვალუტის გაუფასურება და აქციზის გადასახადი.

ნავთობპროდუქტების იმპორტიორთა კავშირის ინფორმაციით, მსოფლიო ბაზარზე ნავთობის ფასების მატება ფიქსირდება. ბოლო ცნობების მიხედვით, მსოფლიოს წამყვან ლონდონისა და ნიუ-იორკის სანავთობო ბირჟებზე ნავთობის ფასი გაიზარდა. კერძოდ, ლონდონში Inter Continental Exchange Futures Europe-ზე (ICE Futures Europe)-Brent ტიპის ნავთობის ფასმა ბარელზე 68,32 დოლარი შეადგინა, რაც ერთი თვის ჭრილში 5,4 დოლარით გაძვირებას ნიშნავს. ნიუ-იორკში კი, York Mercantile Exchange-ზე (NYMEX) - Light Sweet ტიპის ნავთობის ფასი ერთ თვეში 5,6 დოლარით გაძვირდა და ბარელზე 64,92 დოლარი გახდა.

იქიდან გამომდინარე, რომ საქართველოში საწვავის თითქმის 100% იმპორტირდება, აღნიშნულ პროდუქტზე ფასის დადგენისას დიდ როლს ლარის კურსი ასრულებს. როდესაც ლარი უფასურდება, უცხოურ ვალუტაში შესასყიდი საქონელი ადგილობრივი ბაზრისთვის ძვირდება, რადგან, მაგალითად, ერთი დოლარის ღირებულების საქონლის შესასყიდად უფრო მეტი ლარი გვჭირდება. ეროვნული ბანკის ინფორმაციით, ბოლო ერთ წელში, ლარი დოლართან მიმართებით 6,7%-ით არის გაუფასურებული. თუ 2020 წლის მაისის დასაწყისში ერთი დოლარის ღირებულება 3,2106 ლარი იყო, უახლესი კურსის მიხედვით, ერთი დოლარი 3,4271 ლარს უტოლდება.

კიდევ ერთი ფაქტორი, რომელიც ქვეყანაში საწვავზე არსებულ ფასების ფორმირებაზე ახდენს გავლენას, აქციზის გადასახადია. როგორც ცნობილია, 2017 წლის დასაწყისში საწვავზე აქციზურმა გადასახადმა მოიმატა. 1 ტონა ბენზინის აქციზური გადასახადი გაორმაგდა და 250-დან 500 ლარამდე გაძვირდა, ხოლო დიზელზე 150-დან 400 ლარამდე გაიზარდა.

უნდა აღინიშნოს, რომ ქვეყანაში ფასების ზრდის საკმაოდ მაღალი მაჩვენებელი ფიქსირდება. სტატისტიკის მიხედვით, მარტსა და აპრილში წლიური ინფლაცია 7,2% იყო. თებერვალში ფასების 3,6%-იანი, ხოლო იანვარში 2,8%-იანი ზრდა დაფიქსირდა. აღსანიშნავია, რომ მიმდინარე წლის დასაწყისში ინფლაციის დაბალი მაჩვენებელი სახელმწიფოს მხრიდან კომუნალურ გადასახადებზე შეღავათების დაწესებას უკავშირდებოდა.

შეგახსენებთ, რომ ფასების სტაბილურობის მიღწევის მიზნის, გასული თვის მიწურულს ეროვნულმა ბანკმა მონეტარული პოლიტიკა გაამკაცრა და რეფინანსირების განაკვეთი 9,5%-მდე გაზარდა, რის შედეგადაც 125 ათასამდე მსესხებელს კრედიტი 1%-ით გაუძვირდა.