ციანიდის საქმეზე დაკავებული დეკანოზი გიორგი მამალაძე, რომელიც დაკავების დღიდან დუმილის უფლებით სარგებლობდა, დღეს გამოძიებას პირველ ჩვენებას მატროსოვის ციხეში მისცემს.

რუსთავი 2-ის ინფორმაციით, პროკურატურის წარმომადგენლები ადგილზე 3 საათისთვის მივლენ. ადგილზე ასევე აიღებენ ხმის ნიმუშს, რომლითაც ექსპერტიზა დაადგენს, რამდენად ნამდვილია ის ფარული ჩანაწერები, რომლებიც საქმის გარშემო გავრცელდა.

დეკანოზის ადვოკატი, მიხეილ რამიშვილი, რუსთავი 2-თან საუბრისას აცხადებს, რომ მამალაძე დღეს იტყვის, საიდან აღმოჩნდა ქობულეთში, მის სახლში, იარაღი.

გამოძიება შორენა თეთრუაშვილის დაკითხვასაც გეგმავს, თუმცა უცნობია, როდის.

საპატრიარქოს იურისტის თქმით, შორენა თეთრუაშვილი მზადაა პროკურატურის კითხვებს უპასუხოს.

მამალაძის ადვოკატები აცხადებენ, რომ დეკანოზი გამოძიებას ჩვენებას ჯანმრთელობის მდგომარეობის გაუარესების გამო არ აძლევდა. ის საავადმყოფოში დაკავებიდან რამდენიმე დღეში გონების კარგვის გამო გადაიყვანეს.

გუშინ ჭყონდიდის მიტროპოლიტმა პეტრე ცაავამ განაცხადა, რომ დეკანოზი მამალაძე ინფორმაციულ ვაკუუმში იმყოფება.