ჭყონდიდის მიტროპოლიტი პეტრე, აცხადებს, რომ ციანიდის საქმეზე დაკავებულ დეკანოზ გიორგი მამალაძესთან შეხვედრის უფლებას და საშუალებას არ აძლევენ. მისი თქმით, დაკავებული ინფორმაციულ ვაკუუმშიც იმყოფება.

"ძალიან მოულოდნელი პასუხი მივიღე, რომ მის სანახავად არ მიშვებენ. ძალიან დიდ შეცდომებს უშვებს ხელისუფლება ისევ ამ შეთხვევაში. მინდა დავამატო, რომ როდესაც პირველად ვნახე, მამა გიორგი, მას არ აქვს საშუალება საინფორმაციო გამოშვებებს და ახალ ამბებს მოუსმინოს, მას არ აქვს ტელევიზორი. ვფიქრობ ტექნიკური მიზეზით აფერხებენ ამ საკითხის მოგვარებას" - განაცხადა მან.

მეუფე პეტრე გიორგი მამალაძესთან პირველი შეხვედრის შემდეგ აცხადებდა, რომ ის მის უდანაშაულობაში დარწმუნებულია.

მთავარი პროკურატურის ცნობით, 2017 წლის 10 თებერვალს, მკვლელობის მომზადების ფაქტზე დეკანოზი გიორგი მამალაძე დააკავეს. პროკურატურის მტკიცებით, გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ. უწყების განცხადებით, უცნობმა პირმა მიმართა პროკურატურას და მიუთითა, რომ მამალაძეს უნდა მოეხდინა მაღალი იერარქიის სასულიერო პირის სიცოცხლის ხელყოფა.