სასამართლომ პროკურატურის შუამდგომლობა დააკმაყოფილა და ნიკა მელიას აღკვეთის ღონისძიება 40 ათასი ლარის ოდენობის გირაოთი შეუცვალა. შემდეგი სხდომა 13 მაისს გაიმართება.

როგორც ადვოკატმა განმარტა, სასამართლოს გადაწყვეტილება დაუყოვნებლივ შედის ძალაში და მელიამ საპატიმრო რამდენიმე წუთში უნდა დატოვოს.

პროკურატურამ აღკვეთის ღონისძიების შეცვლის შუამდგომლობით სასამართლოს 9 მაისს მიმართა.

8 მაისს ევროკავშირმა ნიკა მელიას გირაოს თანხა გადაიხადა. ევროკავშირის საქართველოს წარმომადგენლობაში აცხადებენ, რომ თანხა გამოყო ევროპულმა ფონდმა დემოკრატიისთვის (European Endowment for Democracy) და საქართველოს ახალგაზრდა იურისტთა ასოციაციამ იგი ხელისუფლებას გადასცა.

პროკურატურამ უნდა მიმართოს სასამართლოს აღკვეთის ღონისძიების შეცვლის შუამდგომლობით, რათა მელიას პატიმრობა გირაოთი შეეცვალოს. თავდაპირველად პროკურატურაში აცხადებდნენ, რომ თანხის ასახვას ელოდებოდნენ, რის შემდეგაც შესაბამის პროცედურებს დაიწყებდნენ.

საქართველოს ახალგაზრდა იურისტთა ასოციაციაში განმარტეს, რომ პროცედურების დასაწყებად თანხის ასახვა არაა საჭირო. მეტიც, საია-ს თავმჯდომარის, ნიკა სიმონიშვილის განმარტებით, პროკურატურას აქამდეც შეეძლო ამ პორცედურის დაწყება.