შარლ მიშელის დოკუმენტზე ხელმომწერმა ოპოზიციურმა პარტიებმა ლელოს ოფისში საარჩევნო კანონმდებლობის რეფორმებზე იმსჯელეს. ხვალ, 10 მაისს ოპოზიციური პარტიებსა და ქართული ოცნების წარმომადგენლებს შორის კაჭრეთში ორდღიანი შეხვედრა დაიწყება, რომელსაც ადგილობრივი და საერთაშორისო ორგანიზაციებიც დაესწრებიან.

როგორც სტრატეგია აღმაშენებლის ლიდერმა, გიორგი ვაშაძემ განაცხადა, რომ საარჩევნო რეფორმაზე სიღრმისეულად იმსჯელეს, მათ შორის ტექნოლოგიურ სიახლეებზე. რაც შეეხება ცესკოს თავმჯდომარის, თამარ ჟვანიას გადაყენებას, ვაშაძე ამბობს, რომ ეს დოკუმენტში ვერ ჩაიწერება.

"მე იმედი მაქვს, ეყოფა რაღაც გაგება ამ ადამიანს, რომ აღარავის აღარ უნდა მისი ცესკოს თავმჯდომარეობა, მარტივად ვთქვათ, და წავა. თუ არ წავა, ცესკოში იქნება რვა ოპოზიციური წევრი, დამატებით ორი პროფესიული წევრი, რომელიც უნდა იყოს [პარლამენტის] 2/3-ით არჩეული და ამით იქნება ძალთა ბალანსი", — აღნიშნა ვაშაძემ.

პარლამენტის დეპუტატმა, შალვა შავგულიძემ თქვა, რომ ოპოზიციის მიერ შეთავაზებული ცვლილებები ეუთო/ოდირისა და ვენეციის კომისიის რეკომენდაციებიდან გამომდინარეობს, ასევე, გათვალისწინებულია მიშელის დოკუმენტის პუნქტებიც.

შეხვედრის შემდეგ გირჩი — მეტი თავისუფლების წევრმა, იმედა კლდიაშვილმა საარჩევნო ბიულეტენის ახალი ვერსია წარადგინა, რომელიც მისი თქმით, ე.წ. კარუსელს აღმოფხვრის.

ფოტო: თამთა კახაბერიძე / On.ge

ბიულეტენს აქვს გარმონის ფორმა, რაც კლდიაშვილის განმარტებით, საარჩევნო უბნიდან ბიულეტენის ნაწილ-ნაწილ გატანას შეუშლის ხელს. ამასთან, ბიულეტენს აქვს QR კოდი და დაცვის სხვა ფუნქციები. პარტიაში ფიქრობენ, რომ ის გამჭვირვალე კონვერტში უნდა ჩაიდოს, რათა არ გაჩნდეს ეჭვი, რომ საარჩევნო ყუთში ცარიელი კონვერტი ვარდება.