ქალთა მოძრაობა და ადამიანის უფლებებზე მომუშავე ორგანიზაციები ქართველი მოდელების პროტესტს ეხმიანებიან. რამდენიმე დღის წინ, ქართველი მოდელი, მარიშა ურუშაძე მძიმე სამუშაო პირობებზე ღიად ალაპარაკდა.

"არ გვქონდა ჩამოსაჯდომი ადგილი, არც ტუალეტი იმავე შენობაში (გოგოების ნახევარს მენსტრუაცია ჰქონდა და ზოგიერთ მათგანს ტამპონის გამოცვლა კიბეებზე მოუწია), არ უზრუნველყვეს ტრანსპორტით ჩვენი გადაადგილება, არც კვება და ბოლოს ისე გამოვიდა, რომ ამაში დამნაშავეც არავინ იყო. ანაზღაურებაზე არც კი ვისაუბრებ, რაც ჩვენს შრომასთან შედარებით უბრალოდ სასაცილოა", — დაწერა მოდელმა Mercedes-Benz-ის მოდის კვირეულთან დაკავშირებული ერთ-ერთი გადაღების შესახებ.

მარიშას პროტესტი წინ უძღვის თბილისის Mercedes-Benz-ის მოდის კვირეულს, რომელიც დღეიდან 9 მაისამდე დისტანციურად გაიმართება. მას სხვა მოდელებიც გამოეხმაურნენ.

აღნიშნულ საკითხთან დაკავშირებით ოფიციალური განცხადება გაავრცელა Mercedes-Benz Fashion Week Tbilisi-მა. ინსტაგრამზე გამოქვეყნებულ პოსტში ორგანიზატორებმა აღიარეს "მთელი რიგი პრობლემების" არსებობა, ამავდროულად კი მოდელების ბრალდებების ადრესატებად სულ სხვა პირები დაასახელეს.

• "აღარ მინდა, თავს მონად ვგრძნობდე" — ქართველი მოდელები მძიმე სამუშაო პირობებზე საუბრობენ

დღეს, 6 მაისს, ქალთა მოძრაობა და კიდევ 20-მდე ხელმომწერი მოდის ბიზნესში დასაქმებულებს სოლიდარობას უცხადებს და სახალხო დამცველსა და შრომის ინსპექციას მოუწოდებს, რომ აღნიშნული პრობლემა შეისწავლონ. არასამთავრობოები ხაზს უსვამენ, რომ ქვეყანაში შრომითი უფლებების სისტემურ რღვევა და უგულებელყოფა პრობლემად რჩება და გამონაკლისი არც მოდის ინდუსტრიაა.

განცხადების ხელმომწერები აღნიშნავენ, რომ სამოდელო სფეროში საქმიანობა სტანდარტული შრომითი საქმიანობაა, რის გამოც, დასაქმებულ მოდელებზე შრომის კანონმდებლობა სრულად ვრცელდება:

"ფაქტია, რომ საქართველოში მოდელები ვერ სარგებლობენ ბაზისური შრომითი უფლებებითაც კი: მათ ძირითად ნაწილს არ აქვს შრომითი ხელშეკრულებები და მუშაობენ არანორმირებული სამუშაო გრაფიკით არაადეკვატური ანაზღაურების სანაცვლოდ, რიგ შემთხვევებში კი - ყოველგვარი ანაზღაურების გარეშე".

ქალთა მოძრაობა და ხელმომწერი ორგანიზაციები და პირები აცხადებენ, რომ მშენებარე ქარხნის ტერიტორიაზე გამართული Mercedes-Benz-ის მოდის კვირეულის ფარგლებში მოდელებს მუშაობა ღირსებისშემლახველ და არასათანადო გარემოში უწევთ:

"არ არიან უზრუნველყოფილი საკვებით, ჰიგიენის დაცვისთვის აუცილებელი პირობებით, ასევე არა აქვთ შესაბამისი სატრანსპორტო უზრუნველყოფა კომენდანტის დროს, რაც დამატებით ქმნის რისკებს უსაფრთხო შრომის გარემოსთან მიმართებით".

განცხადების ავტორები შემდეგი რეკომენდაციებით მიმართავენ სახელმწიფო უწყებებს:

• სახალხო დამცველმა და შრომის ინსპექციის სამსახურმა შეისწავლონ შრომითი უფლებების შესაძლო დარღვევის ზემოაღნიშნული ფაქტები და მოახდინონ რეაგირება მათი უფლებამოსილების ფარგლებში;
• საქართველოს კულტურის, სპორტის და ახალგაზრდობის მინისტრი სისტემურად მიუდგეს კულტურის სფეროში, მათ შორის, მოდის ინდუსტრიაში დასაქმებულთა შრომითი უფლებების დაცვის საკითხს და შექმნას შესაბამისი პოლიტიკა უფლებების დარღვევის პრევენციისთვის.

"აბსოლუტურად გაუმიჯნავი და დაურეგულირებელია სამოდელო სააგენტოების, დიზაინერებისა და ჩვენებების ორგანიზატორების ვალდებულებები და პასუხისმგებლობები. აღნიშნულის შედეგად კი ისევ მოდელები ზარალდებიან", — აცხადებენ ისინი.

ხელმომწერები:

1. ქალთა მოძრაობა;
2. ქალები საერთო მომავლისთვის (WECF) საქართველო;
3. ქალები საქართველოდან;
4. ახალგაზრდა ფემინისტები;
5. გილდია;
6. ქალთა ფონდი საქართველოში;
7. საფარი;
8. ქალთა საინფორმაციო ცენტრი;
9. სამოქალაქო აქტივობისა და თანასწორობის ცენტრი;
10. ქალი და რეალობა;
11. GrlzWave;
12. კავშირი ფრეია;
13. საქართველოს შემეცნებითი ცენტრი;
14. ფემინა;
15. საორსა;
16. მოძრაობა ცვლილებისთვის;
17. პარტნიორობა ადამიანის უფლებებისთვის;
18. ანა ნაცვლიშვილი - საქართველოს პარლამენტის წევრი;
19. ხათუნა სამნიძე - საქართველოს პარლამენტის წევრი.