პარლამენტის დეპუტატის, შალვა პაპუაშვილის განცხადებით, 20 ივნისის ღამეს ზიანი პოლიციელებსაც მიადგათ და აქციის მონაწილეებსაც — მათ შორის, ზოგს მართლზომიერი ქმედების შედად, ზოგს გადამეტების.

"ზიანი მიადგა ყველას. პოლიციელებს, აქციის მონაწილეებს. ზოგი ეს ზიანის მიყენება იყო მართლზომიერი ქმედების შედეგად, ზოგი შეიძლება გადამეტების შედეგად იყო. გასაგებია, მაგრამ სწორედ ამიტომ არის ამნისტია, რომ დანაშაულს ან სავარაუდო დანაშაულს ეხება", — განაცხადა პაპუაშვილმა.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა წერია, რომ მხარეებმა ხელმოწერიდან ერთი კვირის ვადაში, "პოლიტიზებულ მართლმსაჯულებად" აღქმულ ორ საკითხზე რეაგირება უნდა მოახდინონ ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს. ამნისტია შეეხება ნაციონალური მოძრაობის თავმჯდომარეს, ნიკა მელიას. პროექტის დარეგისტრირების შემდეგ, ამავე დღეს პრეზიდენტი გიორგი რურუას შეწყალების აქტს გამოსცემს.

გაიგეთ მეტი: