თინა ხიდაშელმა პირველი არხის გადაცემა ვექტორში საუბრისას აღნიშნა, რომ რუსეთის გარდა საქართველოს დედაქალაქშიც ისმოდა უკმაყოფილება "ღირსეული პარტნიორის" წვრთნებთან დაკავშირებით.

თავდაცვის მინისტრის თქმით, საქართველო იმ მდგომარეობაში არაა, რომ ამას ყურადღება არ მიაქციოს ან მნიშვნელობა არ მიანიჭოს, თუმცა საქართველო დამოუკიდებელი ქვეყანაა:

"მთავარი ისაა, უნდა გავუწიოთ თუ არა ამას [რუსეთის გაღიზიანებას] ანგარიში. საქართველო დამოუკიდებელი ქვეყანაა თავისი საკუთარი გადაწყვეტილებებითა და თავისი საკუთარი არჩევანით. ქართველი ხალხი ბოლო 25 წელია ირჩევს იმ ხელისუფლებას, რომელიც ირჩევს რომ საქართველო მიდის ნატოსკენ და საქართველო მიდის ევროკავშირისკენ".

თინა ხიდაშელის თქმით, ოქტომბერში საქართველოს მოქალაქეები კიდევ ერთხელ აირჩევენ სურთ თუ არა ის ხელისუფლება, რომელიც ნატოში გაწევრიანების ოცნების რეალიზებას შეეცდება, ისე როგორ უკლებლივ ყველა წინა მთავრობა.

"ოკუპაცია, რომელიც ყოველდღიურად სახეზეა ჩვენს ქვეყანაში, აგრესია რომლის შედეგებსაც მუდმივად ვიღებთ, არის საუკეთესო პასუხი ჩვენი მოსახლეობისთვის კითხვაზე, უნდა აირჩიოს თავისუფლება [ნატო] თუ მუდმივად იარაღის ქვეშ ცხოვრება" - დასძინა მან.

თავდაცვის მინისტრის თქმით, მისი მთავარი მიზანია საქართველომ არჩეული კურსიდან არ გადაუხვიოს და არ დაუშვას სკეპტიკური განწყობების მატება ქვეყანაში ნატოსთან და ევროკავშირთან მიმართებაში.