ჭყონდიდის ეპარქიაში, სალხინოს მამათა მონასტერში დაპირისპირება მოხდა.

დაპირისპირების გამომწვევი მიზეზი ერთ-ერთი ბიზნესმენის, კლიმენტი კეკუტიას მისვლა გახდა.

"ფაქტი სახეზეა, კარი გავუღეთ, ტაძარი დალაგებული დავახვედრეთ, ბზა მოკრეფილი დავახვედრეთ და მოვიდნენ და წირონ. ამის სანაცვლოდ მოგვიყვანეს კეკუტია, რომელიც, გაფრთხილებული გვყავდა, რომ ჩვენ მას არ მივიღებდით, მტერია მაგი ჩვენი. მარტო ჩვენი კი არა, ამ სოფლის მტერია მაგი", — განაცხადა ერთ-ერთმა სასულიერო პირმა, რომელიც ადგილზე ამ ბიზნესმენის ჩასვლის წინააღმდეგი იყო.

როგორც სასულიერო პირები აცხადებდნენ, მათ ერთადერთი მოთხოვნა ჰქონდათ მეუფე სტეფანესთან, რომ არ მიეყვანა ადგილზე კეკუტია.

დაპირისპირება მოხდა ეკლესიაში მეუფე სტეფანეს მისვლის შემდეგაც. მისი მხარდამჭერები და მოწინააღმდეგეები ერთმანეთს ფიზიკურად და სიტყვიერად დაუპირისპირდნენ. სასულიერო პირები მას სთხოვდნენ პასუხს, რატომ მიიყვანა ადგილზე ბიზნესმენი.

ადგილზე მყოფთა ინფორმაციით, მამა ანანია კალანდიას ფიზიკურად გაუსწორდნენ, რის გამოც სასწრაფოს გამოძახებაც გახდა საჭირო.

ფოტო: Berdia Kalandia

დღეს ბზობის დღესასწაულთან დაკავშირებით ადგილზე წირვა-ლოცვა ტარდება. დაძაბული ვითარების გამო ადგილზე მობილიზებულია პოლიცია.