თუ სავარძელზე მოკალათებულ ბავშვებთან ერთად მათი მშობლების შეხვედრის ისტორიის მოსმენა მოგენატრათ, თქვენთვის კარგი ამბავი გვაქვს: Hulu-მ პოპულარული სერიალის How I Met Your Mother-ის სპინოფი, სახელად How I Met Your Father დააანონსა. სერიალში მთავარ როლს ჰილარი დაფი შეასრულებს.

How I Met Your Father-ის მთავარი პერსონაჟი სოფია, რომელიც მომავალში 2021 წლის მოვლენებს იხსენებს და შვილს ქმართან შეხვედრის ისტორიას უყვება. სერიალი გაცნობის აპლიკაციებსა და რომანტიკულ ურთიერთობებთან დაკავშირებულ თანამედროვე გამოწვევებზეც გაამახვილებს ყურადღებას. ჯერჯერობით უცნობია, რა კავშირი ექნება ახალ სერიალს ძველი სერიალის პერსონაჟებთან თუ ისტორიასთან.

ახალი სერიალის შემქმნელები აიზეკ აფთეიქერი და ელიზაბეთ ბერგერი არიან, სერიალის პროდიუსერები კი How I Met Your Mother-ის შემქმნელები — კარტერ ბეისი და კრეიგ ტომასი.

How I Met Your Mother ტელეეკრანებზე პირველად 2005 წელს გამოჩნდა და ჯამში 9 სეზონისგან შედგება. სერიალის მთავარი გმირი, ტედ მოსბი მომავალში შვილებს მათ დედასთან შეხვედრის ამბავს უყვება, თუმცა თხრობისას ტედის საუკეთესო მეგობრებსა და სხვა უამრავ საინტერესო პერსონაჟსაც ვეცნობით.

აღსანიშნავია, რომ ეს სერიალის სპინოფის შექმნის პირველი მცდელობა არაა. 2013 წელს How I Met Your Dad-ის საპილოტე ეპიზოდი დაიგეგმა, თუმცა, საბოლოოდ, პროექტი არ შედგა.