პარლამენტის ჯანდაცვის კომიტეტში, თამბაქოს კონტროლის კანონმდებლობის რეფორმის საჭიროება - პრობლემები და გამოწვევები, კონფერენცია-გამოფენა და საკომიტეტო განხილვა მიმდინარეობს.

საქართველოს პარლამენტში წარდგენილია კანონპროექტი თამბაქოს კონტროლის შესახებ, რაც ითვალისწინებს დახურულ შენობებში, საზოგადოებრივი თავშეყრის ადგილებში, საზოგადოებრივ ტრანსპორტსა და სტადიონებზე თამბაქოს მოწევის აკრძალვას. კანონპროექტის ავტორია თამბაქოს კონტროლის ალიანსში შემავალი ორგანიზაციები, ხოლო ინიციატორი - პარლამენტის წევრი გუგული მაღრაძე.

21 თებერვლის საკომიტეტო სხდომაზე, ინიციატორი კანონპროექტის ძირითად პრინციპებსა და დებულებებს პირველ მოსმენაზე წარადგენს.

კანონპროექტის განმარტებით ბარათში ვკითხულობთ, რომ ცვლილებების შედეგად უნდა ჩამოყალიბდეს საზოგადოებაში ჯანსაღი დამოკიდებულება თამბაქოს მავნებლობასთან მიმართებაში. ასევე, პროექტის თანახმად, მაქსიმალურად უნდა შემცირდეს არასრულწლოვანთა ჩართულობა თამბაქოს მოხმარებისაგან და ხელმიუწვდომელი გახდეს საზოგადოების ფართო მასებისათვის თამბაქოს მოხმარება.

პროექტით თამბაქოს მოწევის სრული აკრძალვა შეეხება:

ნებისმიერ შენობა-ნაგებობას, გარდა:

  • კერძო საცხოვრებელი სახლებისა;
  • თამბაქოს კვამლის შემსწავლელი სპეციალიზირებული ლაბორატორიული დანადგარებისა;
  • პატიმრობის და თავისუფლების აღკვეთის დაწესებულებებისა;

კანონპროექტით აკრძალვა ასევე შეეხება:

  • საზოგადოებრივ ტრანსპორტის ყველა სახეობას;
  • სააღმზრდელო, საგანმანათლებლო და საგანმანათლებლო სააღმზრდელო, ნებისმიერი სხვა სასწავლო დაწესებულებას;
  • ბიბლიოთეკებს;
  • მოსწავლე ახალგაზრდობის ბანაკებს;
  • ბავშვთა გასართობი ცენტრებისა და 18 წლამდე პირებისთვის განკუთვნილი სხვა
    დაწესებულებების როგორც შენობა-ნაგებობებში, ისე მათ ტერიტორიაზე;
  • 18 წლამდე პირებისთვის განკუთვნილ საზოგადოებრივ შეკრებებს;
  • სამედიცინო და ფარმაცევტულ დაწესებულებათა შენობა-ნაგებობებსა და მათ ტერიტორიაზე, გარდა სტაციონარული ფსიქიატრიული და პალიატიური მკურნალობისთვის განკუთვნილი დაწესებულებების ხელმძღვანელების მიერ განსაკუთრებულ შემთხვევებში გამოცემული სპეციალური ბრძანებისა.

კანონპროექტით განსაზღვრულია მოწევის აკრძალვისა და შეზღუდვის აღსრულებაზე, დაწესებულებათა ხელმძღვანელობის პასუხისმგებლობა. კერძოდ, ხელმძღვანელმა არ უნდა დაუშვას, ხოლო დარღვევის შემთხვევაში, დაუყოვნებლივ აღკვეთოს დაწესებულებაში თამბაქოს მოხმარება, იმ ადგილებში სადაც კანონით მოწევა აკრძალულია.

გარდამავალი დებულებების სახით კანონპროექტით განსაზღვრულია, რომ 2017 წლის 1 ივლისამდე შენობა-ნაგებობებიდან სასტუმროებს ეძლევათ ვადა, როცა მათ შეუძლიათ სრულ აკრძალვამდე დაუშვან მოწევა ნომრების არაუმეტეს 50%-ში. საჯარო დაწესებულებებს, საზოგადოებრივი კვების ობიექტებს, სილამაზის სალონებს, მაღაზიებს და სავაჭრო ობიექტებს სრულად აკრძალვამდე შენობის 20%-ში კედლებით გამოყონ მოსაწევი ადგილები, 2018 წლის 1 იანვრამდე ოფისებს, ქარხანა-ფაბრიკებს, საამქროებს, საწყობებს, ტერმინალებს და სხვა მსგავსი დაწესებულებებს, სტადიონებს დაუშვან მოწევა მკაფიოდ განსაზღვრულ ადგილებში, აგრეთვე არასამარშრუტო ტაქსების მფლობელებს სურვილის შემთხვევაში დაუშვან მოწევა.

გარდა ამისა, პროექტით იკრძალება თამბაქოს მოწევის ან მოხმარების სხვა ფორმების დემონსტრირება მასობრივი ინფორმაციის საშუალებით, სხვა ბეჭდური ან ელექტრონული საშუალებით.