პრეზიდენტი გიორგი რურუას მხოლოდ მაშინ შეიწყალებს, როცა პარტიები დოკუმენტს ხელს მოაწერენ და პარლამენტში შევლენ. სალომე ზურაბიშვილის განცხადებით, როცა ევროკავშირისა და აშშ-ს წარმომადგენლობა იტყვის, რომ შეთანხმება შედგა, ერთ კვირაში ის შეწყალების აქტს გამოსცემს.

"ჩემი გადაწყვეტილება განხორციელდება მხოლოდ მაშინ, როცა პარტიები ხელს მოაწერენ დოკუმენტს და შევლენ პარლამენტში და მეორე მხრივ, როცა ევროკავშირისა და აშშ-ს წარმოამდგენლები განაცხადებენ, რომ შეთანხმება შედგა. ამ განცხადებიდან ერთ კვირაში გამოვცემ შეწყალების აქტს", — განაცხადა მან.

მანვე აღნიშნა, რომ გიორგი რურუას წარსული არცერთი ნიშნით არ ჯდება შეწყალების კატეგორიაში, თუმცა მისივე თქმით, ერთხელ უკვე გადააბიჯა თავს და ამას კიდევ გააკეთებს ქვეყნის მომავლისა და სტაბილურობისთვის.

"მგონი, არავის გაუკვირდება, თუ ვიტყვი, რომ ჩემთვის როგორც საზოგადოებისთვის, კარგად ცნობილი წარსულის მქონე პირი, რომელსაც ბევრი რამე შეიძლება დავარქვათ, გარდა პოლიტპატიმრისა, არც ერთი ნიშნით, ეს იქნება ზნეობრივი, მორალური თუ პოლიტიკური, არ ჯდება შეწყალების რომელიმე კატეგორიაში. ამის მიუხედავად, როგორც ერთხელ უკვე გადავაბიჯე ჩემს თავს და მივიჩნევდი და დღესაც მივიჩნევ, რომ თუ სასწორზე დგას პოლიტიკური ჩიხიდან გამოსვლა, სტაბილურობა და წინსვლა, პრეზიდენტის მოვალეობა სწორედ ის არის, რომ საკუთარ შეხედულობებსა და პრინციპებზე მაღლა დააყენოს ქვეყანა. ამის გათვალისწინებით, მზად ვარ, მივიღო ჩემთვის ნამდვილად სკანდალური გადაწყვეტილება. ამ გადაწყვეტილებას ვიღებ მხოლოდ და მხოლოდ ჩემი პრიობით: ეს ნაბიჯი ამ კრიზისის დასრულებისთვის ბოლო აკორდი უნდა იყოს და გზა გაუხსნას იმას, რომ ყოველგვარი სხვა მოთხოვნის გარეშე, ქვეყანა და პარლამენტი შეუდგნენ ნორმალურ პოლიტიკურ რეჟიმს და გამოწვევებთან გამკლავებს", — განაცხადა მან.

გიორგი რურას თაობაზე საუბარი იყო შარლ მიშელის დოკუმენტში — კერძოდ, დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება.

საუბარი იყო ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

18 აპრილს ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

გირჩმა დოკუმენტს ხელი უკვე მოაწერა და პარლამენტშიც შევიდა. ნაციონალურ მოძრაობაში კი აცხადებენ, რომ ამ სახით დოკუმენტს ხელს არ მოაწერენ. ამის შესახებ პარტიის წევრმა, აკო მინაშვილმა თქვა.

პოლიტიკური მართლმსაჯულების გარდა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: