საქართველოს ექსპრეზიდენტი, მიხეილ სააკაშვილი აცხადებს, რომ ცესკოს თავმჯდომარის, პრფესიული წევრების, მოსამართლის და გენერალური პროკურორის დანიშვნა ევროპაში აპრობირებული მეთოდით უნდა მოხდეს, სადაც კომისია იღებს გადაწყვეტილებს, რომელშიც 3 წევრს ევროკავშირი, 3 წევრს ოპოზიცია, 3 წევრს კი მთავრობა ნიშნავს.

"მთავარი კითხვა რაც მე მაქვს: როგორ ხდება საარჩევნო კომისიის დაკომპლექტება? და ეს უნდა ახლიდან დაკომპლექტდეს, რა თქმა უნდა. როგორ ხდება პროკურატურის დაკომპლექტება და სასამართლოს დაკომპლექტება? არსებობს კარგად გამოციდლი პრაქტიკა უკრაინის, ბალკანეთის ქვეყნების, ევროპის მიერ გაკეთებული, სადაც შერჩევას ახდენს 3 წევრი დანიშნული ევროკავშირის მიერ, 3 დანიშნული მთავრობის მიერ, 3 დანიშნული ოპოზიციის მიერ. ასე უნდა დაინიშნოს საარჩევნო კომისიის პროფესიული წევრები, მოსამართლეები და მთავარი პროკურორი", — განაცხადა სააკაშვილმა.

მისივე თქმით, თუ კი აღნიშნული ცვლილებები არ განხორციელდა და ცენტრალური საარჩევნო კომისია თავიდან არ დაკომპლექტდა, ცვლილებას აზრი არ აქვს.

"ძალიან მნიშვნელოვანია, რომ პირველად ე.წ. ქართულმა ოცნებამ აღიარა, რომ საქართველოში შეიძლება და უნდა ჩატარდეს რიგგარეშე საპარლამენტო არჩევნები. ესე იგი, უნდა მოხდეს არჩევნების გზით ხელისუფლების ცვლილება. ამიტომ, მე მადლობელი ვარ ჩვენი ევროპელი და ამერიკელი პარტნიორებისთვის, რადგან აქამდე მიიყვანეს საქმე და ეს, თავისთავად არის დიდი წინგადადგმული ნაბიჯი. მაგრამ აქ არის რამდენიმე საკითხი: ჯერ ერთი, დაფიქსირება — ადგილობრივ არჩევნებზე მიბმა და 43%. რატო 43%-ზე და არა 50%-ზე, ქართველი ხალხის მინიმუმ ნახევარზე? 50%+1ზე?. მეორე, ვინ დაითვლის, ეს იქნება 43%, 5%, 30%, 70%? ისინი დღევანდელი დოკუმენტით ტოვებენ თამარ ჟვანიას და ტოვებენ მთლიანად ქოცების მიერ კონტროლირებად საარჩევნო კომისიას, რომელიც 3%-ც რომ მიიღოს ქართულმა ოცნებამ, დაუთვლიან 43%+1", — ამბობს სააკაშვილი.

18 აპრილს ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

გირჩმა დოკუმენტს ხელი უკვე მოაწერა და პარლამენტშიც შევიდა. ნაციონალურ მოძრაობაში კი აცხადებენ, რომ ამ სახით დოკუმენტს ხელს არ მოაწერენ. ამის შესახებ პარტიის წევრმა, აკო მინაშვილმა თქვა.

დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: