გირჩის ლიდერებმა, ვახტანგ მეგრელიშვილმა, ალექსანდრე რაქვიაშვილმა და იაგო ხვიჩიამ შეთანხმების დოკუმენტს ხელი პარტიის ფეისბუქგვერდის პირდაპირ ეთერში მოაწერეს.

"ჩემი აზრით, ამაზე არის ხელი მოსაწერი. გუშინ იყო განცხადებაში, რაც, ჩემი აზრით, მხარდასაჭერია, რომ თითოეულმა პარლამენტის წვერმა უნდა მიიღოს გადაწყვეტილებაო. ანუ, ინდივიდუალურ გადაწყვეტილებაზე დაიყვანეს ჩვენმა დასავლელმა მეგობრებმა თავიანთი წინადადება. მე ვფიქრობ, რომ იმ 60-მა ადამიანმა, თუ რამდენიც არის დარჩენილი, თვითონ უნდა გადაწყვიტოს, უნდა შეთანხმება და ამ ხალხის გვერდზე დგომა, თუ უნდა, რომ ფეხებზე დაიკიდოს ეს ხალხი და საერთოდ ყველაფერი და არ ვიცი რა გააკეთოს. მოდი, ჩვენ რაღაცნაირი მაგალითი მივცეთ იმის, რომ ეს შესაძლებელია და ხელი მოვაწეროთ ამ დოკუმენტს [...]

აი, მე მოვაწერე ამას ხელი, რომ შერიგდეს მიშა და ბიძინა. ეს არის დასაწყისი რაღაც შერიგების", — განაცხადა ვახტანგ მეგრელიშვილმა.

ხვიჩიამ დოკუმენტის ხელმოწერისკენ სხვებსაც მოუწოდა.

"ვუსურვოთ წარმატება ზოგადად ამ პროექტს და მე მინდა, რომ მოგვბაძონ ადამიანებმა, ჩვენმა კოლეგებმა ოპოზიციიდან და ხელისუფლებიდან", — განაცხადა იაგო ხვიჩიამ.

გირჩის წევრები დღეს პარლამენტში მიდიან. იაგო ხვიჩიას თქმით, ისინი არ აპირებენ საპარლამენტო საქმიანობაში მონაწილეობას, თუმცა ისარგებლებენ პარლამენტარის გარკვეული პრივილეგიებით.

• რა წერია შარლ მიშელის ახალ დოკუმენტში და რაზე თანხმდება ოპოზიცია — დეტალები

18 აპრილს, ევროკავშირის წარმომადგენლობაში გამართულ შეხვედრაზე ქართულ ოცნებასა და ოპოზიციას ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა. მხარეებს მოსაფიქრებლად დრო მიეცათ.

დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც გაზიარებულია ვადამდელ არჩევნებთან დაკავშირებით ქართული ოცნების წინადადებაა, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.