ქართული ოცნების განცხადებით, შეთანხმების მისაღწევად პარტიამ არაერთი მნიშვნელოვანი კომპრომისული ნაბიჯი გადადგა და ახლა ჯერი ოპოზიციაზეა. მმართველმა პარტიამა სპეციალური განცხადება ევროკავშირის წარმომადგენლობაში დაგეგმილი შეხვედრის მეორედ გადადების პარალელურად გაავრცელა.

"ქართულმა ოცნებამ, ქვეყნის წინაშე საკუთარი პასუხისმგებლობის გაცნობიერებით, ხელი მოაწერა ამ დოკუმენტს და დამატებით გამოხატა მზადყოფნა თვითმმართველობის არჩევნებზე ნდობის 40%-იანი პრინციპის გამოყენებაზე. ქართულმა ოცნებამ შეთანხმების მისაღწევად არაერთი მნიშვნელოვანი კომპრომისული ნაბიჯი გადადგა. ჩვენი მხრიდან ევროკავშირის და პრეზიდენტ შარლ მიშელის ეგიდით წარდგენილ დოკუმენტზე ხელმოწერა უკვე დაფიქსირებულია. ახლა ჯერი ოპოზიციაზეა. მოვუწოდებთ ოპოზიციას, ქვეყნის ინტერესები დააყენოს ყველაფერზე მაღლა და ხელი მოაწეროს აღნიშნულ დოკუმენტს", — აღნიშნულია განცხადებაში.

პარტია ოპონენტებს ახსენებს, რომ "დღეს ჩვენი ქვეყანა სერიოზული გამოწვევების წინაშე დგას" და მაგალითებად პანდემიას, სოციალურ პრობლემებს, რეგიონის გეოპოლიტიკურ მდგომარეობას ასახელებს.

"ასეთ დროს, მიგვაჩნია, რომ მთელი ქვეყანა უნდა იყოს გაერთიანებული საერთო გამოწვევების გარშემო, ხოლო პოლიტიკოსები ქვეყნისა და საზოგადოების წინაშე არსებული პრობლემების გადაჭრაზე უნდა მუშაობდნენ", — აცხადებენ ქართულ ოცნებაში.

თბილისში, ევროკავშირის წარმომადგენლობაში დაგეგმილი შეხვედრა უკვე მეორედ გადაიდო, მიზეზი კვლავ უცნობია. თავდაპირველად, ოპოზიცია და ქართული ოცნება ევროკავშირისა და აშშ-ის ელჩებს 14:00 საათზე უნდა შეხვედროდნენ, ნახევარი საათით ადრე კი ცნობილი გახდა, რომ შეხვედრა 17:00 საათისთვის გადაიდო. მოგვიანებით გაირკვა, რომ ეს შეხვედრაც გადაიდო და ამ დროისთვის არსებული ინფორმაციით, მხარეები ერთმანეთს 19:00 საათზე შეხვდებიან.

შეხვედრის გადადებას წინ უძღოდა ევროკავშირის უმაღლესი წარმომადგენლისა და ევროკომისიის ვიცეპრეზიდენტის პრესსპიკერის, ასევე აშშ-ის სახელმწიფო დეპარტამენტის პრესსპიკერის ერთობლივი განცხადება, რომელშიც საქართველოს პარლამენტის ყველა წევრს მოუწოდებდნენ, ხელი მოაწერონ შარლ მიშელის დოკუმენტს. აღსანიშნავია, რომ განცხადების ტექსტის მიხედვით, სავარაუდოა, რომ მიშელი მხარეებს ახალ დოკუმენტს წარუდგენს.

"მოვუწოდებთ საქართველოს პარლამენტის ყველა წევრს ხელი მოაწეროს შეთანხმებას, რომელიც დღეს ევროპული საბჭოს პრეზიდენტის შარლ მიშელის მიერ იქნება შეთავაზებული. ეს არის შეთანხმება, რომელსაც ყველა წევრმა კეთილსინდისიერების პრინციპის დაცვით უნდა მოაწეროს ხელი. ცალმხრივი განცხადებები ძირს უთხრის ფართო შეთანხმების მიღწევის მიზანს", — აღნიშნულია განცხადებაში.

აღსანიშნავია, რომ მმართველი პარტია აქამდე შემოთავაზებულ დოკუმენტს ხელს აწერს. გარდა ამისა, არჩილ თალაკვაძის განცხადებით, ქართული ოცნება მზად არის, 40%-იანი მხარდაჭერის პრინციპი გამოიყენოს, რაც იმას ნიშნავს, რომ, თუ მმართველი პარტია თვითმმართველობის არჩევნებში 40%-ს ვერ მიიღებს, ისინი ოპოზიციის მოთხოვნებს რიგგარეშე არჩევნებთან დაკავშირებით განიხილავენ. ოპოზიციაში კი აცხადებენ, რომ შეთანხმება მიღწეული იქნება მხოლოდ მას შემდეგ, რაც გადაწყდება ვადამდელი არჩევნებისა და პოლიტპატიმრების საკითხი.

ქართული ოცნების მიერ დოკუმენტზე ხელმოწერას წინ უძღოდა პარტიის თავმჯდომარის, ირაკლი კობახიძის ამერიკის შეერთებულ შტატებში ვიზიტი. კობახიძის განცხადებით, აშშ-ში შეხვედრებისას პარტნიორები მიანიშნებენ, რომ მათ, როგორც მმართველმა პარტიამ კრიზისის გადასაჭრელად ნაბიჯები უნდა გადადგან.

30 მარტს ქართული ოცნებისა და ოპოზიციის მორიგი მედიაცია უშედეგოდ დასრულდა. მათ ევროპული საბჭოს პრეზიდენტ შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. თავდაპირველად ხელი არ მოაწერა არც მმართველმა პარტიამ.

კრისტიან დანიელსონის მიერ წარმოდგენილ დოკუმენტში საკითხები რამდენიმე პუნქტად იყო დაყოფილი. ის ეხებოდა:

  • პოლიტიზებულ მართლმსაჯულებად აღქმულ საკითხებზე რეაგირებას;
  • ამბიციურ საარჩევნო რეფორმას;
  • კანონის უზენაესობა/სასამართლო რეფორმას;
  • პარლამენტში ძალაუფლების განაწილებას;
  • მომავალ არჩევნებს.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.