პოლიტიკური მოძრაობა ხალხისთვის ლიდერი, ანა დოლიძეს ექსპრემიერ გიორგი გახარიასთან, რომელიც გადადგომის მიუხედავად არსად წასვლას არ აპირებს და უფრო მეტიც, არც პოლიტიკიდან არ მიდის, "10 განსაწმენდელი კითხვა" აქვს.

დოლიძის კითხვები მიემართება გახარიას გუნდის წევრებსაც, რომლებმაც 14 აპრილს ქართული ოცნება დატოვეს და პარლამენტში ოპოზიციის სკამებზე გადასხდნენ.

"არ მგონია სწორი იყოს პარლამენტში ერთი ფლიგელიდან მეორეში გადაჯდე, ოპოზიცი დაირქვა და ამით დაემშვიდობო ყველა იმ შეცდომას და დანაშაულს, რომელიც შენ რვაწლიან კარიერას უკავშირდება", — აცხადებს დოლიძე.

დოლიძის თქმით, გახარიას და მის ახალ პარტიას "აქვს გასავლელი პოლიტიკური განსაწმენდელი".

"ეს არის რელიგიაში ცნება, როცა ადამიანს პასუხი მოეთხოვება ჩადენილი ცოდვებისთვის. პოლიტიკაში როგორც ოპოზიციონერის დაბრუნება ასე მარტივი არ არის", — განმარტავს დოლიძე.

მასი თქმით, გახარიამ, სულ მცირე, 10 კითხვაზე უნდა გასცეს პასუხი:

1. დასავლური თუ რუსული ვექტორი — დოლიძის ინფორმაციით, გახარიას აქვს მჭიდრო კავშირები რუსეთთან, ამიტომ ელის განმარტებას, როგორი იქნება მისი პოლიტიკური ვექტორი;
2. გავრილოვის ღამე — გახარიას, როგორ შს მინისტრის პასუხისმგებლობა;
3. სასამართლო — დოლიძე გახარიას პირდაპირ ეთერში, სასამართლოს რეფორმაზე სასაუბროდ იწვევს;
4. ხელმოწერა ნამახვანი ჰესის ხელშეკრულებაზე;
5. სამართლიანობის აღდგენა — დოლიძის თქმით, ხელისუფლებაში მოსვლის შემდეგ გახარიას არაფერი გაუკეთებია წინა ხელისუფლების დროს ჩადენილი უსამართლობების გამოსასწორებლად;
6. აზარტული თამაშები — დოლიძე ვარაუდობს, რომ გახარია მფარველობდა აზარტული თამაშების ბიზნესს;
7. გაფართოებული ოკუპაცია;
8. არავითარი წინსვლა არ გვქონია საერთაშორისო ფლანგზე;
9. განადგურებული და ჩამოშლილი ეკონომიკა;
10. ქართული ოცნების მემკვიდრეობის გაზიარება — დოლიძის თქმით, გახარიამ, როგორც ქართული ოცნების მმართველობის დროინდელმა ბიზნესომბუდსმენმა, შსს-სა და ეკონომიკის მინისტრმა და პრემიერმინისტრმა, უნდა გაიზიაროს მმართველი პარტიის მიმართ არსებულ კრიტიკაზე პასუხისმგებლობა.

გადადგომის შემდეგ, გიორგი გახარია პირველი საჯარო კომენტარი 22 მარტს გააკეთა და თქვა, რომ არსად წასვლას არ აპირებს და პოლიტიკაში რჩება. რამდენიმე საათში იმავე შინაარსის წარწერით მან ოფიციალურ ფეისბუქგვერდზე ფოტო გამოაქვეყნა. იმავე საღამოს კი მან ტვიტერზე დაპოსტა, რომ პოლიტიკური დღის წესრიგის შექმნაზე მუშაობს.

14 აპრილს, ქართული ოცნების ექვსმა დეპუტატმა პარტია დატოვა და ყოფილი პრემიერმინისტრის, გიორგი გახარიას "პარტიის მშენებლობის ახალ ეტაპზე" უერთდებიან. ესენი არიან:

1. გიორგი ხოჯევანიშვილი;
2. მიხეილ დაუშვილი;
3. ანა ბუჩუკური
4. ალექსანდრე მოწერელია;
5. ბექა ლილუაშვილი;
6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.