ქართული ოცნების თავმჯდომარე ირაკლი კობახიძე აშშ-ის სენატის საგარეო ურთიერთობათა კომიტეტის თავმჯდომარეს, ჯიმ რიშს შეხვედება. პრესსამსახურის ინფორმაციით, შეხვედრა 14 აპრილს, თბილისის დროით ღამის პირველ საათზე გაიმართება.

კობახიძესთან ერთად, შეხვედრას დაესწრებიან ქართული ოცნების საერთაშორისო მდივანი კახაბერ კუჭავა, ფრაქცია ქართული ოცნების თავმჯდომარის მოადგილე ირაკლი ჩიქოვანი და საქართველოს ელჩი ამერიკის შეერთებულ შტატებში დავით ბაქრაძე.

ჯიმ რიში ერთ-ერთი ყველაზე კრიტიკულად განწყობილი სენატორია და არაერთხელ გაუკრიტიკებია ქართული ოცნების ხელისუფლება. სწორედ მან განაცხადა, რომ თუ საქართველოში ასეთი სიტუაცია გაგრძელდება და პროგრესი არ იქნება, ფინანსური დახმარების საკითხი უნდა გადაიხედოს. მისივე თქმით, თუ საქართველო დემოკრატიას არ აამუშავებს, ევროატლანტიკური წევრობის შანსს დაკარგავს. გარდა ამისა, სენატორი რიში მელიას დაკავებას პოლიტიკურად მოტივირებულ საქმედ აფასებს.

კობახიძის ვიზიტი ამერიკის შეერთებულ შტატებში 16 აპრილამდე გაგრძელდება. დელეგაცია შეხვედრებს გამართავს კონგრესმენებთან, სენატორებთან, სახელმწიფო დეპარტამენტისა და თეთრი სახლის მაღალი რანგის წარმომადგენლებთან, ასევე ამერიკული Think Tank- ების ხელმძღვანელებთან.