ნამახვანჰესის მოწინააღდეგეთა კარვების დაშლისას ადგილზე მყოფმა აქტივისტებმა ალკოჰოლური სასმელების ბოთლები შენიშნეს და აცხადებენ, რომ ისინი სამართალდამცავებმა მიიტანეს. აქტივისტები ამას პროტესტის დისკრედიტაციის მცდელობად აფასებენ და ალკოტესტის ჩატარებას ითხოვენ, რათა დადასტურდეს, რომ სასმელს თავად არ მოიხმარდნენ.

კარვების დაშლის გადაწყვეტილების შესახებ ინფორმაცია შინაგან საქმეთა სამინისტომ დაახლოებით ერთი საათის წინ გაავრცელა და აქციის მონაწილეთა სიცოცხლისა და ჯანმრთელობის დაცვის მოტივით ახსნა. აქტივისტებმა პოლიციელებს სთხოვეს ნივთების შესაგროვებლად და კარვებიდან გასატანად დრო მიეცათ, თუმცა სამართალდამცავებმა უთხრეს, რომ დაშლა დროულად უნდა დაეწყოთ.

აქტივისტები ადგილიდან ფეისბუქ-ლაივით ერთვებიან, სადაც ჩანს, რომ მათ პირადი ნივთები გამოაქვთ კარვებიდან. სწორედ ამ პროცესში შეამჩნიეს მათ არყისა და ლუდის ბოთლები. ისინი ამბობენ, რომ ალკოჰოლული სასმელი არ ჰქონდათ და ცარიელი ბოთლები "პოლიციელებმა ჩაუდეს".

"სასმელი რატომ გაჩნდა აქ, მინდა შეგახსენოთ ეგ ამბავი. გუშინ ის გათამაშებული სპექტაკლი რაც იყო, რომ ვითომ ადამიანი, რომელიც გადავარდა რიონში, მერე მიაკერეს, რომ თურმე ნასვამი იყო. ალბათ, მაგის გაგრძელებაა ეს ამბავი, რომ დღეს არყის ბოთლებს ვხედავთ ჩვენი სამზარეულოს ნივთებში", — ამბობს ერთ-ერთი აქტივისტი, დათო სიმონია.

ჰესის მოწინააღდეგე აქტივისტის, ვარლამ გოლეთიანის განცხადებით, მთელი პროტესტის განმავლობაში, ტერიტორიაზე დაწესებული შინაგანაწესით აკრძალული ჰქონდათ ალკოჰოლური საშუალებების შეტანა.

On.ge დაუკავშირდა შინაგან საქმეთა სამინისტროს და მათ პასუხს მიღებისთანავე შემოგთავაზებთ.

მეორე დღეა მდინარე რიონში კაცს ეძებენ. როგორც ნამახვანჰესის აშენების მოწინააღმდეგე აქტივისტები ყვებიან, იგი პროტესტს რამდენიმე დღის წინ შეუერთდა. თვითმხილველი ამბობს, რომ გვიან ღამით იგი მდინარეში შევიდა და მცდელობის მიუხედავად მისი გამოყვანა ვერ შეძლეს.

ვრცელდება ვერსია, რომ კაცი ნაცსამ მდგომარეობაში იყო, თუმცა ამას იმ მცხოვრები აქტივისტები გამორიცხავენ და ამბობენ, რომ ტერიტორიაზე ალკოჰოლის შეტანა არ შეიძლება.

გამოძიება სისხლის სამართლის კოდექსის 115-ე მუხლით დაიწყო, რაც თვითმკვლელობამდე მიყვანას გულისხმობს. საგანგებო სიტუაციების მართვის სამსახურის ინფორმაციით, სამძებრო სამუშაოებში 20 მეხანძრე-მაშველი და 6 მყვინთავი, ყველა საჭიროა აღჭურვილობითაა ჩართული.