საქართველოს პრემიერ-მინისტრის, გიორგი კვირიკაშვილის თქმით, ე.წ. ციანიდის საქმეს ბევრი სპეკულაცია მოჰყვა. ეს კომენტარი პრემიერმა ბერლინში ილია მეორესთან საავადმყოფოში ვიზიტის შემდეგ გააკეთა:

"ვფიქრობთ, რომ უზარმაზარი სპეკულაციათა ნაკადი მოჰყვა და ვფიქრობ, რომ ეს არის აბსოლუტურად უადგილო. ჩვენ გვინდა ყველამ ყველაფერი გავაკეთოთ, რომ მუხტი ჩავახშოთ. გამოძიებას მივცეთ საშუალება, რომ დაასრულოს გამოძიება, დაადგინოს ყველა დეტალი და მხოლოდ ამის შემდეგ ვისაუბროთ საჯაროდ. მე ყველა დეტალს ვფლობ. როდესაც სასულიერო პირი მომწამლავი ნივთიერებით კვეთს საზღვარს და მოდის იქ სადაც პატრიარქი იმყოფება და ჩვენ მას ვაკავებთ, რა თქმა უნდა, დიდი უბედურების თავიდან აცილებაზეა საუბარი. სავარაუდო მსხვერპლთა რაოდენობას და ვინაობას გამოძიება დაადგენს"

დღესვე გავრცელდა საქართველოს მთავარი პროკურატურის განცხადება. უწყების პრესსამსახურის უფროსი ნათია სუხიაშვილი, გაზეთ რეზონანსთან ინტერვიუში აცხადებს, რომ პროკურორს არ უხსენებია პატრიარქის მკვლელობის მომზადება. მისივე თქმით, არც ის დადგენილა გამოძიებით, რომ მაღალი იერარქიის სასულიერო პირის მკვლელობა იგეგმებოდა.

13 თებერვალს, პრემიერ-მინისტრი დეკანოზ გიორგი მამალაძის დაკავების ფაქტს ასე გამოეხმაურა:

"აღკვეთილია ქვეყნის წინააღმდეგ დაგეგმილი დანაშაული და ეკლესიის წინააღმდეგ ვერაგული თავდასხმა".

მთავარი პროკურატურის ცნობით, 2017 წლის 10 თებერვალს, მკვლელობის მომზადების ფაქტზე დეკანოზი გიორგი მამალაძე დააკავეს. პროკურატურის მტკიცებით, გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ. უწყების განცხადებით, უცნობმა პირმა მიმართა პროკურატურას და მიუთითა, რომ მამალაძეს უნდა მოეხდინა მაღალი იერარქიის სასულიერო პირის სიცოცხლის ხელყოფა.