საქართველოს მთავარი პროკურატურის განცხადებით, 2017 წლის 10 თებერვალს, მკვლელობის მომზადების ფაქტზე დეკანოზი გიორგი მამალაძე დააკავეს. პროკურატურის განცხადებით, გამოძიება დაიწყო 2017 წლის 2 თებერვალს ერთ-ერთი მოქალაქის განცხადების საფუძველზე.

გამოძიების დეტალები

პროკურატურის ცნობით, საგამოძიებო ორგანოს უცნობმა პირმა მიმართა და მიუთითა, რომ მისმა ნაცნობმა მამა გიორგი მამალაძემ სთხოვა სიცოცხლისთვის საშიში შხამიანი ნივთიერების - ციანიდის მოძიებაში დახმარება:

"როგორც შეხვედრისას განმცხადებელმა გაარკვია, მას [გიორგი მამალაძეს] უნდა მოეხდინა მაღალი იერარქიის სასულიერო პირის სიცოცხლის ხელყოფა. აღნიშნული განცხადების მიღებისთანავე დაწყებული გამოძიების ფარგლებში საქართველოს პროკურატურაში დაიგეგმა და ჩატარდა ყველა საჭირო საგამოძიებო მოქმედება".

გამოძიების ვერსიით, მამა გიორგი მამალაძე განმცხადებელს სთხოვდა შემჭიდროვებულ ვადებში შხამიანი ნივთიერების - ციანიდის მოძიებას. პროკურატურის მტკიცებით, ნივთიერების მოპოვების სანაცვლოდ, მამალაძე მზად იყო გადაეხადა ფულადი თანხა, ხოლო თავის მხრივ გაწეული დახმარებისთვის ჰპირდებოდა მომავალში გარკვეულ არამართლზომიერ სარგებელს:

"გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ, მის თანმხლებ პირებთან ერთად და მას შხამიანი ნივთიერება სჭირდებოდა გამგზავრებამდე".

გამოძიების ამ ეტაპზე მოპოვებული ინფორმაციით, გიორგი მამალაძე ამზადებდა ერთ-ერთი პირის მკვლელობას:

"სწორედ ამ მიზნით შეიძინა მან გამოძიებით ამ ეტაპზე დაუდგენელი პირისგან შხამიანი ნივთიერება - ციანიდი, რომლის გამოყენების შემთხვევაშიც გარდაუვალი იქნებოდა სასიკვდილო შედეგი და სისრულეში იქნებოდა მოყვანილი ბრალდებულის დანაშაულებრივი განზრახვა".

გამოძიების ინფორმაციით, დეკანოზ გიორგი მამალაძეს, რომელიც ამავდროულად იყო შპს საქართველოს საპატრიარქოს წმინდა იოაკიმე და ანას სახელობის სამედიცინო ცენტრის გენერალური დირექტორი, სამსახურებრივი საქმიანობიდან გამომდინარე სისტემატიური ურთიერთობა ჰქონდა კათოლიკოს-პატრიარქთან და მის უახლოეს გარემოცვასთან.

პროკურატურის მტკიცებულებები

2017 წლის 10 თებერვალს, თბილისის საერთაშორისო აეროპორტში, ბრალდებულის სახით გიორგი მამალაძე გერმანიაში გამგზავრებამდე დააკავეს.

პროკურატურის განცხადებით, მამალაძის ბარგის ჩხრეკისას აღმოაჩინეს ფარულად შენახული შხამიანი ნივთიერება - ნატრიუმის ციანიდი.

პროკურატურის განცხადებით, სამართალდამცავებმა გიორგი მამალაძის საცხოვრებელი ბინის ჩხრეკისას, კუსტარული წესით დამზადებული უნომრო ცეცხლსასროლი იარაღი და 6 ცალი საბრძოლო ვაზნა ამოიღეს.

2017 წლის 12 თებერვალს, პროკურატურის შუამდგომლობის საფუძველზე, თბილისის საქალაქო სასამართლოს განჩინებით გიორგი მამალაძეს აღკვეთის ღონისძიების სახით შეეფარდა პატიმრობა.

გამოძიება გრძელდება საქართველოს სისხლის სამართლის კოდექსის 18-108-ე და 236-ე მუხლებით, რაც სასჯელის სახედ და ზომად ითვალისწინებს თავისუფლების აღკვეთას ვადით შვიდიდან თხუთმეტ წლამდე.

მთავარი პროკურორის ირაკლი შოთაძის თქმით, დაკავებული დანაშაულს არ აღიარებს.