რუსი კომუნისტი დეპუტატი, სერგეი გავრილოვი პროპგანდისტი ჟურნალისტის, ვლადიმერ პოზნერის ვიზიტის პროტესზე თავის თეორიებს ავრელებს და საქართველოს ოპოზიციას თავს ესხმის. გავრილოვმა მომხდარი კიდევ ერთხელ გამოიყენა იმისთვის, რომ ოპოზიცია რადიკალებად წარმოეჩინა, აქცია კი "ქართული სტუმართმოყვარეობის" შერცვენად.

ამავდროულად ის კმაყოფილებას გამოხატავს პოზნერის ვიზიტის გამო და ფიქრობს, რომ ეს მოწმობს ქართული საზოგადოებისა და "რაციონალურად მოაზროვნე ხელისუფლების" სურვილს რუსეთთან ურთიერთობა აღადგინონ. მეტიც, ავრცელებს პროპაგანდისტულ ნარატივს, თითქოს "რადიკალური ოპოზიცია", რომელიც დასავლეთიდან იმართება ხელისუფლებას აშანტაჟებს პროვოკაციებით და ამით ურთიერთობას ძაბავს რუსეთთან.

რუსულ სახელმწიფო მედიასთან, TASS-თან საუბრისას ის ამტკიცებს, თითქოს ოპოზიციის ლიდერებმა პოზნერი სპეციალურად შეარჩიეს "პოლიტიკური დემარშისთვის", რადგან მას "რუსულ ინტელიგენციაში" პატივს სცემენ.

"ეს შემთხვევა სერიოზული პოლიტიკური დემარშია და მისი ფიგურა შემთხვევით არ შეურჩევიათ, რადგან პოზნერი ფართოდ ცნობილი და პოპულარულია რუსულ ინტელიგენციაში. ეს მიზანმიმართული პროვოკაციაა, რომელიც ურტყამს საქართველოს, როგორც სტუმართმოყვარე ქვეყნის სახეს. ეს სტუმართმოყვარეობა გულისხმობს სტუმრის უსაფრთხოებასაც. ეს არის რადიკალური ოპოზიციის მცდელობა, აჩვენონ ყველა ტურისტს, რომ საქართველოში ჩასვლა არ შეიძლება. ეს გააზრებული სროლაა "ორივე ფეხში" იმისთვის, რომ დასუსტდეს ხელისუფლება, ეკონომიკა. [...]

მაგრამ აგრესიული რადიკალური უმცირესობები, რომლებიც დასავლური წრეების ინსტრუმენტები არიან, აშანტაჟებენ ხელისუფლებას პროვოკაციების მოწყობით იმ მიზნით, რომ რუსულ-ქართული ურთიერთობები შეინარჩუნონ გახლეჩილ მდგომარეობაში", — აცხადებს ის.

მსგავს შეფასებებს ავრცელებდა გავრილოვი 20 ივნისის შემდეგაც. ბოლო ორი წელია ის უმეტესად ოპოზიციას აკრიტიკებს და ანტირუსულ ნარატივში ადანაშაულებს და ხელისუფლებას აქებს.

რუსი პროპაგანდისტი საქარველოში — ქეიფი და პროტესტი

რუსი პროპაგანდისტისა და ტელეწამყვანის, ვლადიმერ პოზნერის თბილისში ჩამოსვლას მოქალაქეების პროტესტი მოჰყვა. პოზნერის თქმით, საქართველოში დაბადების დღის აღსანიშნავად ჩამოვიდა. მას თან რუსული ესტრადის მომღერლები ახლავს.

იმ სასტუმროსთან, სადაც პოზნერი სტუმრებთან ერთად ე.წ. კომენდანტის საათის დროს ქეიფობდა, საპროტესტო აქცია გაიმართა. მოქალაქეები ხელისუფლებას აკრიტიკებდნენ პოზნერის ქვეყანაში შემოშვების გამო და მოითხოვდნენ, რომ მან საქართველო დატოვოს. პროტესტის მიუხედავად პოზნერი და მისი თანმხლები პირები ქეიფს აგრძელებდნენ.

შინაგან საქმეთა სამინისტროს განცხადებით, პოზნერს ოკუპაციის შესახებ კანონი არ დაურღვევია და ქვეყანაში მთავრობის დადგენილების წესების დაცვით შემოვიდა. რაც შეეხება კომენდანტის საათისას სოციალური ღონისძიების გამართვას, შრომის ინსპექციამ ობიექტი დააჯარიმა, ხოლო შსს-ში აცხადებენ, რომ კომენდანტის საათის დროს გადაადგილებისთვის ყველა სტუმარს დააჯარიმებენ.

ვლადიმერ პოზნერმა და მისმა თანმხლებმა პირებმა სასტუმრო პროტესტის ფონზე პოლიციის კორდონით დატოვეს. ისინი ავტობუსში Putin Khuilo-ს შეძახილებისა და საქართველოს ჰიმნის ფონზე ავიდნენ.

ამის შემდეგ ისინი სასტუმრო რუმსში გადავიდნენ, სადაც აქტივისტებმაც გადაინაცვლეს. დემონსტრანტებმა სასტუმროს კვერცხები დაუშინეს.

პოზნერი სამ აპრილამდე დარჩენას გეგმავდა, თუმცა მისი ვიზიტი დროზე ადრე დასრულდა. დილით ადრე მან, თანმხლებ პირებთან ერთად საქართველო დატოვა.

გაიგეთ ვინ რა თქვა მომხდარზე:

ვინ არის ვლადიმერ პოზნერი

ვლადიმერ პოზნერი რუსეთის სახელმწიფო პროპაგანდისტული არხის, პერვი კანალის წამყვანია. სხვადასხვა დროს მას ჰქონია გადაცემები, სადაც რუსული ნარატივი ტარდებოდა და განიხილავდნენ, რომ საქართველო ცალკე არაფერს წარმოადგენს და "რუსეთის მშვენებაა", მაგრამ ახლა, როცა დამოუკიდებელია, "საცოდავად" გამოიყურება. ამ აზრს ეთანხმებოდა პოზნერიც.

ამავდროულად, მას აქვს გაკეთებული არაერთი განცხადება საქართველოს ოკუპირებულ რეგიონებზე. მაგალითად, აგვისტოს ომის დაწყებაში, როცა რუსეთმა ცხინვალის რეგიონის ოკუპაცია მოახდინა, ის საქართველოს ადანაშაულებდა.

"პირველ რიგში, საქართველო დაესხა თავს სამხრეთ ოსეთს და არა პირიქით. ეს ყველამ იცის, რომ პირველი სროლები საქართველოს მხრიდან იყო", — ამბობდა ის და ატარებდა კრემლის ნარატივს იმაზე, რომ მათ ჯარებს თბილისამდე ჩასვლა შეეძლოთ, მაგრამ შეჩერდნენ.

გარდა ამისა, პოზნერი ამტკიცებდა, რომ აფხაზები ოცნებობდნენ საქართველოსგან გამოყოფას, რადგან ქართველები მათ დამაკნინებლად ექცეოდნენ.

2006 წელს პოზნერი ვლადიმერ პუტინმა მამულის წინაშე განსაკუთრებული ღვაწლისთვის დააჯილდოვა. მაშინ მიზეზად რუსული ტელე-რადიოს განვითარებისთვის გაწეული შრომა დასახელდა.