აშშ-ს სახელმწიფო დეპარტამენტის ანგარიშში, რომელიც საქართველოში უფლებრივ მდგომარეობას ეხება, პოლიტიკურად მოტივირებული დაკავებების ქვეთავში რამდენიმე საქმეს განიხილავს.

ანგარიშში მოყვანილია არასამთავრობო ორგანიზაციების 2019 წლის განცხადება, რომლის თანახმად პოლიტიკურად მოტივირებული სისხლისსამართლებრივი დევნა გაზრდილია. მაგალითის სახით მოყვანილია თიბისი ბანკის დამფუძნებლების, მამუკა ხაზარაძისა და ბადრი ჯაფარიძის წინააღმდეგ არსებული გამოძიება, მთავარი არხის გენერალური დირექტორის, ნიკა გვარამიასა და TV პირველის დამფუძნებლის მამის, ავთანდილ წერეთლის საქმეები. ამასთან, 20 ივნისს ანტისაოკუპაციო აქციებზე მონაწილე პირების დაკავებები, რომელთა შორის იყო ირაკლი ოქრუაშვილიც.

"დაკავებულების ოპოზიციური პარტიის წარმომადგენლები და ოჯახის წევრები აცხადებდნენ, რომ ხელისუფლებას პოლიტპატიმრები ჰყავს", — ნათქვამია ანგარიშში.

დოკუმენტში ასევე ნახსენებია პრეზიდენტის მიერ გიგი უგულავასა და ირაკლი ოქრუაშვილის შეწყალება. როგორც სახელმწიფო დეპარტამენტი აღნიშნავს, ოპოზიციური პარტიები მათ გათავისუფლებას 8 მარტის შეთანხმების საფუძველზე ითხოვდნენ. ამასთან, ოპოზიცია კვლავ მოითხოვდა გიორგი რურუას გათავისუფლებას, რომელსაც პოლიტპატიმრად მოიხსენიებს.