ქართული ოცნების თავმჯდომარის, ირაკლი კობახიძის განცხადებით, მათ 4 ნიუანსთან დაკავშირებით მოსაზრებები ჰქონდათ, თუმცა ულტიმატუმი არცერთ პუნქტზე არ იყო დაყენებული.

"ჩვენ გვქონდა 4 ნიუანსთან დაკავშირებით მოსაზრებები, თუმცა ამ 4 ნიუანსთან დაკავშირებითაც აღვნიშნეთ, რომ ჩვენ მზად ვიყავით არგუმენტებით გაგვეგრძელებინა მსჯელობა, მაგრამ ულტიმატუმი არცერთ პუნქტთან დაკავშირებით არ იყო დაყენებული. ამ 4 პუნქტზე გვინდოდა უბრალოდ დამატებით მსჯელობის გაგრძელება, არცერთზე არ იყო ულტიმატუმი დაყენებული, შესაბამისად ჩვენ გამოვთქვით ჩვენი პრინციპული თანხმობა ხელმოწერასთან დაკავშირებით, დოკუმენტის მთლიანად ხელმოწერასთან დაკავშირებით. რაც შეეხება ოპოზიციას, ოპოზიცია იყო თავიდანვე გაღიზიანებული იმით, რომ მოდერატორმა, კრისტიან დანიელსონმა საერთოდ არ შეიტანა პუნქტი არჩევნებთან დაკავშირებით და ბოლომდე ამასთან დაკავშირებით ჰქონდა პრინციპული პოზიცია და აქედან გამომდინარე დააყენა ერთი ულტიმატუმი ოპოზიციამ და მეორე ულტიმატუმი უკავშირდებოდა რურუას თემას. ეს ორი ულტიმატუმი გახდა მიზეზი იმისა, რომ დიალოგის გაგრძელებამ დაკარგა აზრი", — განაცხადა კობახიძემ.

გუშინ, 30 მარტს ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

გაიგეთ მეტი:

რა ეწერა დოკუმენტში, რომელსაც მხარეებმა ხელი არ მოაწერეს