გირჩის ერთ-ერთი ლიდერის, ვახტანგ მეგრელიშვილის განცხადებით, ხელისუფლება მოლაპარაკებებზე "ერთმნიშვნელოვნად" ამბობდა, რომ დოკუმენტს ხელს მოაწერდა. ამის შესახებ მან შეხვედრის დასრულების შემდეგ ჟურნალისტებს განუცხადა.

"ერთი მხრისთვის კომპრომისი უნდა ყოფილიყო პოლიტპატიმრები, ანუ ადამიანები, ხოლო მეორე მხრივ, კომპრომისი უნდა ყოფილიყო უარი. ანუ ოპოზიციის მხრიდან კომპრომისი უნდა ყოფილიყო გარკვეული უარი რიგგარეშე არჩევნებზე და პრობლემა მდგომარეობს იმაში, რომ მხარეებმა ეს კომპრომისი ვერ დაინახეს. ხელისუფლება, სხვათა შორის იძახდა, ერთმნიშვნელოვნად რომ რაც არ უნდა იყოს, მე ამ დოკუმენტს ხელს ვაწერო. ანუ მცირე შენიშვნები შეიძლება მაქვსო, მაგრამ მე ამ დოკუმენტს ხელს ვაწერო", — თქვა მან.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.