ქართული ოცნების თავმჯდომარის, ირაკლი კობახიძის განცხადებით, საუბარი იმაზე, რომ მოლაპარაკებების მაგიდას მიხეილ სააკაშვილი და ბიძინა ივანიშვილი უნდა მიუსხდნენ, "სინამდვილის გამრუდების მცდელობაა". კობახიძემ ევროპარლამენტარი ანდრიუს კუბილიუსის განცხადება შეაფასა.

ევროპარლამენტარი ანდრიუს კუბილიუსი ქართულ ოცნებასა და ოპოზიციას შორის მოლაპარაკების პროცესში არაფორმალური ლიდერების ჩართვის იდეით 25 მარტს გამოვიდა.

როგორც მმართველი გუნდის თავმჯდომარე აღნიშნავს, კუბილიუსის განცხადება სპეკულაციურია, რადგან ივანიშვილი პოლიტიკიდან გასულია. მისივე თქმით კი, მიხეილ სააკაშვილმა" დანაშაულებრივი სისტემა შექმნა, ხოლო ივანიშვილი ეს "აღკვეთა".

"როცა ერთსა და იმავე ტონალობაში ახსენებ ამ ორ ადამიანს, ეს არის, რბილად რომ ვთქვათ, სპეკულაცია და შეურაცხყოფა, ბუნებრივია. აქედან გამომდინარე, ჩვენ რბილად ამ განცხადებას ვერ შევაფასებთ", — ამბობს კობახიძე.

ევროპარლამენტარმა ანდიურს კუბილიუსმა ფორმულასთან ინტერვიუს დროს აღნიშნა, რომ პრობლემის მოგვარებისთვის უფრო ეფექტური იქნება, თუ ევროპული საბჭოს პრეზიდენტის წარმომადგენელი, კრისტიან დანიელსონი დაელაპარაკება რეალურ ლიდერებს, რომლებიც დღემდე მოლაპარაკებებში არ მონაწილეობენ. იგი ექს-პრეზიდენტ მიხეილ სააკაშვილსა და ქართული ოცნების ყოფილ თავმჯდომარეს, ბიძინა ივანიშვილს გულისხმობდა.