"ანიტა, ანიტაა, რასაც უნდა, იმას იტყვის, მაგრამ მან არ იცის, რომ მე არ ვარ კულტურის მინისტრი. მე ვარ #5 ქალთა კოლონიის პატიმარი, რადგან, როცა ვიყავი იუსტიციის მინისტრი, ქალბატონმა ანიტამ ფეისბუქზე გამასამართლა და ჩამსვა ციხეში", — ასე გამოეხმაურა მეცოსოპრანოს, ანიტა რაჭველიშვილის კრიტიკას კულტურის მინისტრი თეა წულუკიანი. რადიო იმედის ეთერში მან თქვა ისიც, რომ რაჭველიშვილს ან ქართველი ქალი პოლიტიკოსები არ უყვარს, ან კონკრეტულად წულუკიანი და სალომე ზურაბიშვილი არ მოსწონს.

"ეს ხუმრობით. ასევე, საკანში მყავს სალომე ზურაბიშვილი, რომელიც, Instagram-ზე ქალბატონმა ანიტამ გაასამართლა და ისიც ჩასვა ციხეში“. რატომღაც ქალბატონ ანიტას, არ უყვარს ქართველი პოლიტიკოსი ქალები, ან უყვარს, მაგრამ ჩვენ არ ვუყვარვართ", — აღნიშნა მან.

წულუკიანი ამბობს, რომ მის ნათქვამს ინტერპრეტაცია მოყვა და არასწორად გაიგეს. მისი თქმით, ამას კრიტიკულად გამოეხმაურა პაატა ბურჭულაძეც, რომელსაც მან დიდი ხელოვანი, მაგრამ ხელმოცარული პოლიტიკოსი უწოდა. მანვე აღნიშნა, რომ "ეს მისთვის პრობლემა არ არის".

"ისინი ილაპარაკებენ იმას, რაც უნდათ, მაგრამ საზოგადოება თვითონ გადაწყვეტს, რა არის სწორი და რა — არა. თუ შენ ხარ ამ დონის ხელოვანი და ქართველებს ეუბნები, რომ ეს ვიღაცა მინისტრი არ მომწონს და მე შენ ჩემს შემოქმედებას არ გაზიარებ, ეს მინიმუმ დასანანია. მინისტრი დღეს არის, ხვალ არ იქნება და ანიტას, პაატას თუ სხვების შემოქმედება დარჩება საუკუნეებს", — განაცხადა მან.

წულუკიანი აღნიშნავს, რომ მას არ აქვს ამაზე დასაკარგი დრო, რადგან "იდეალურ ვარიანტში" მხოლოდ 4 წელი აქვს რაიმეს შესაცვლელად. გარდა ამისა, აღნიშნავს, რომ განსხვავებულ აზრის წარმომავლობა იმიტომ აინტერესებს, რომ იცოდეს რისი გაკეთება შეუძლია.

"მე კიდევ ერთხელ ვამბობ, რომ ვისაც ამის სურვილი ექნება, ჩაერთვება ჩემთან ერთად ამ პროცესში, იმიტომ, რომ განსხვავებული აზრი არის ძალიან მნიშვნელოვანი, რომ გავიგო საიდან მოდის, რა აწუხებს და მე რა შემიძლია გავაკეთო. თორემ ჩემს აზრზე ვინც არის, იმის მოსმენა არ არის პრობლემა", — აღნიშნა მან.