დიპლომატი გიორგი ფანიაშვილი ამბობს, რომ განსხვავებული აზრის გამოხატვის გამო საგარეო საქმეთა სამინისტრომ ის დაითხოვა. როგორც ფანიაშვილი ყვება, ის დიდი ბრიტანეთისა და ჩრდილოეთ ირლანდიის გაერთიანებულ სამეფოში მუშაობდა, როცა ერთ-ერთ პორტალზე სტატიების გამოქვეყნება დაიწყო.

იგი აღნიშნავს, სწორედ სტატიებში განსხვავებული აზრის გამოხატვის გამო დაითხოვეს ის სამსახურიდან. მისივე თქმით, სტატიები ძირითადად საქართველოს საგარეო პლიტიკის ანალიზსა და იმ პრობლემატიკის განხილვას ეხებოდა.

"რაიმე დახურული ან საიდუმლო ინფორმაცია, არც ერთ სტატიაში არ ეწერა და არავის კრიტიკას არ შეეხებოდა, არც რომელიმე პოლიტიკური პარტიის და არც რომელიმე პოლიტიკოსის თუ ჩინოვნიკის. ეს იყო სუფთა საინფორმაციო-ანალიტიკური სტატია", — აღნიშნავს ფანიაშვილი On.ge-სთან.

მისივე თქმით, მის საქმეზე საელჩოში ადმინისტრაციული წარმოებაც დაიწყო, რომლის შედეგადაც არაფერი დადგენილა. საბოლოოდ კი ის რეორგანიზაციაში მოყვა.

საგარეო საქმეთა სამინისტროში გიორგი ფანიაშვილის ბრალდებებს უარყოფენ. როგორც უწყებაში ამბობენ, ფანიაშვილს საელჩოში უფროსი მრჩევლის პოსტი ეკავა და მას 2020 წლის დეკემბერში გამოცხადებული რეორგანიზაცია შეეხო.

"საზღვარგარეთ საქართველოს დიპლომატიურ წარმომადგენლობებში მოხდა საკადრო ერთეულების ოპტიმიზაცია, რომლის თანახმადაც დიდი ბრიტანეთისა და ჩრდილოეთ ირლანდიის გაერთიანებულ სამეფოში საქართველოს საელჩოში ის დიპლომატიური პოზიცია, რომელიც ეკავა გიორგი ფანიაშვილს გაუქმდა. აღსანიშნავია, რომ რეორგანიზაციის შედეგად ასევე გაუქმდა საზღვარგარეთ საქართველოს სხვა დიპლომატიურ მისიებში საერთო ჯამში 9 თანამდებობა", — აღნიშნავენ სამინისტროში.

უწყებაში აღნიშნავენ, რომ ფანიაშვილს გადაწყვეტილების შესახებ ერთი თვით ადრე აცნობეს და ორი ალტერნატიული თანამდებობის დაკავება შესთავაზეს, რაზეც მან უარი თქვა. რაც შეეხება სტატიების გამოქვეყნებას, სამინისტროში ამბობენ, რომ ამ მხრივ საელჩოს ყოფილ თანამშრომელს პრობლემა არ ჰქონია.

გიორგი ფანიაშვილი ამბობს, რომ სამინისტროს მიერ შეთავაზებული ალტერნატიული პოზიციები ფორმალური იყო. მისი თქმით, 25 თებერვალს მას ინდოეთში ან მოლდოვაში უფრო მრჩევლის თანამდებობა შესთავაზეს, რაზეც გადაწყვეტილება პირველ მარტამდე უნდა მიეღო.

"როგორ გგონიათ ხუთშაბათს თუ პარასკევს მივიღე [შეთავაზება] და ორშაბათს უნდა მეთქვა, კონტინენტს შევიცვლიდი თუ არა. ეს იყო უბრალოდ ფორმალური შეთავაზება", — აღნიშნავს ის.

ფანიაშვილის განცხადების საპასუხოდ, საგარეო საქმეთა სამინისტროში განაცხადეს, რომ მან
25 თებერვალის მიიღო გაფრთხილება მოსალოდნელი გათავისუფლების შესახებ და ასევე მიიღო შეთავაზება სისტემაში დასაქმების შესახებ, 1-ლ მარტს უნდა განეცხადებინა თანხმობა შეთავაზებასთან დაკავშირებით, მოქმედი კანონმდებლობის შესაბამისად და არა ის, რომ 1-ლ მარტს წასულიყო.