ბებიას, რომელსაც შვილიშვილის კალსელების მიმართ მიმართ განხორციელებული იძულება ედება ბრალად აღკვეთის ღონისძიების სახით 4 000-ლარიანი გირაო შეუფარდეს.

20 მარტს ტელეკომპანია ფორმულამ გაავრცელა ინფორმაცია, რომ სკოლის მოსწავლეებს შორის მომხდარი ჩხუბის შემდეგ, ორმა ბიჭმა კლასელი დააჩოქა და ბოდიშის მოხდა ამ ფორმით მოსთხოვა. მოგვიანებით, საქმეში ამ ბიჭის ბებია ჩაერთო და ბავშვებს, რომლებმაც მას ბოდიშის მოხდა აიძულეს, იმავე ფორმით მოახდევინა ბოდიში. ეს ყველაფერი ვიდეოზეა დაფიქსირებული.

პროკურატურის განცხადებით, გამოძიების ამ ეტაპზე დადგინდა, რომ 2020 წლის 4 ნოემბერს, სკოლის მოსწავლეებს შორის წარმოშობილი კონფლიქტის გამო, მე-6 კლასის მოსწავლეებმა ვ.ა.-მ და გ.მ-მ თანაკლასელს, მ.კ.-ს ფიზიკური შეურაცხყოფა მიაყენეს, ასევე აიძულეს დაეჩოქა და თანაკლასელებისთვის ბოდიში მოეხადა.

უწყების ინფორმაციით, აღნიშნული ფაქტი ცნობილი გახდა მ.კ-ს ოჯახის წევრებისთვის, რის გამოც 8 ნოემბერს, მ.კ-ს ბებიამ, ვ.კ.-მ, ანალოგიური მეთოდით, მათი ნების საწინააღმდეგოდ, იძულებით დააჩოქა მუხლებზე არასრულწლოვანი ვ.ა. და გ.მ და დაჩოქილებს მისი შვილიშვილისთვის ბოდიში მოახდევინა.

პროკურატურის ცნობით, ბებიას ბრალდება საქართველოს სისხლის სამართლის კოდექსის 150-ე მუხლის მეორე ნაწილის "ა" ქვეპუნქტით წარუდგინეს, რაც ადამიანისთვის ქმედების თავისუფლების უკანონო შეზღუდვას გულისხმობს.