ბოლო კვირის განმავლობაში ტაივანში სახელის შეცვლის მსურველთა რიცხვი მოულოდნელად გაიზარდა, ამის მიზეზი კი ერთ-ერთი რესტორანია, რომელიც სუშის მოყვარულებს საინტერესო აქციას სთავაზობს: მომხმარებელს, რომლის სახელიც ორაგულის აღმნიშვნელი იეროგლიფებით იწერება, რესტორანში 5 მეგობართან ერთად უფასოდ ჭამა შეუძლია. ამისათვის მომხმარებელმა რესტორანში პირადობის დამადასტურებელი მოწმობა უნდა წარადგინოს.

სუშის მოყვარულები ამ შემოთავაზებას ენთუზიაზმით შეხვდნენ და სახელების გადასაკეთებლად გაემართნენ. ზოგიერთმა ეს შესაძლებლობა მდიდარი ფანტაზიის გამოსავლენად გამოიყენა და რესტორანს უცნაური სახელით მიაკითხა. უცნაურ სახელთა შორისაა "ორაგულის პრინცი" და "ორაგული შემწვარი ბრინჯიც".

ამ ხუმრობაზე სახელმწიფო უწყებებს ნამდვილად არ გასცინებიათ, რადგან მოულოდნელად უამრავი საქმე გამოუჩნდათ. სახელის გადაკეთება ტაივანში $3 ღირს, სოციალურ ქსელში კი ორმა მომხმარებელმა დაწერა, რომ რესტორანში $460-ის ღირებულების სუში უფასოდ მიირთვეს.

ხელისუფლების ერთ-ერთმა წარმომადგენელმა აქციით აღფრთოვანებულ ადამიანებს შეახსენა, რომ სახელის შეცვლა, კანონის მიხედვით, მხოლოდ სამჯერაა შესაძლებელი, ამიტომ ადამიანები ამ საკითხს რაციონალურად უნდა მიუდგნენ. აგრეთვე, განაცხადა, რომ სახელის ასეთი მიზეზის გამო შეცვლა სახელმწიფო რესურსების გაფლანგვას იწვევს.