ამ წუთებში მთავარ პროკურატურასთან ე.წ. კაბელების საქმეზე გამოტანილი განაჩენის გასაპროტესტებლად აქცია გრძელდება. აქციის ერთ-ერთმა ორგანიზატორმა, თავისუფალი დემოკრატების ლიდერმა, ირაკლია ალასანიამ საქმეში მსჯავრდებულებს მიმართა და დაპირდა, რომ მათ საქართველოს მოსახლეობა არ მიატოვებს:

"საქართველო და ქართველი ხალხი გამოგიხსნით იმ ტყვეობიდან, რომელშიც ერთი კაცის ნებით, პოლიტიკური ზეწოლით, ივანიშვილის გადაწყვეტილებით აღმოჩნდით. მე, როგორც მოქალაქე, როგორც კაცი, როგორც ოფიცერი, როგორც მამა, როგორც მეუღლე, როგორც შვილი სიცოცხლეს გავწირავ თქვენთან ერთად, რომ ეს ადამიანები დაუბრუნდნენ საკუთარ ოჯახებს, საქართველოს და თავიანთ მაგარ საქმეს, ემსახურონ თავიანთ ქვეყანას".

ალასანია ამბობს, რომ ივანიშვილის ხელისუფლებას ამ ადამიანების დამნაშავედ ცნობა არ შერჩება:

"ჩვენ ყველამ ერთად პირობა უნდა დავდოთ ერთმანეთის წინაშე, იმ 5 უდანაშაულო ადამიანის წინაშე, მათი ოჯახებისთვის, რომ საქართველოში აღარ განმეორდეს, რომ უდანაშაულოდ ოჯახური ტრაგედიები ჩვენ წინ ხდებოდეს. უნდა შევფიცოთ ერთმანეთს, რომ არ გავუტარებთ ივანიშვილს ამ უსამართლობას. არ გავუტარებთ იმიტომ, რომ ჩვენი შვილებისთვის უკეთესი მომავალი გვინდა".

აქციაზე იმყოფებიან თავისუფალი დემოკრატებისა და სხვა პარტიების წარმომადგენლები, მსჯავრდებულების ოჯახის წევრები და მათი მხარდამჭერები თბილისიდან და რეგიონებიდან.