ეკონომიკის მინისტრმა, ნათია თურნავამ, ნამახვანის ჰესზე საუბრისას ზოგადად, ჰესებისადმი საზოგადოების უარყოფით დამოკიდებულებაზე ისაუბრა და განაცხადა რომ ეს "პრობლემა" გასული საუკუნის 80-იანი წლებიდან არსებობს. პალიტრანიუსის ეთერში თურნავა შეეხო ხუდონის ჰესს და აღნიშნა, რომ იგი აშენებული რომ იყოს, დღეს ქვეყანა ეკონომიკურად გაცილებით ძლიერი იქნებოდა.

"ნაწილი ადამიანების ჰესების მიმართ არის დიდი უნდობლობით განმსჭვალული და ეს არ არის დღევანდელი პრობლემა. ეს პრობლემა გასული საუკუნის 80-იანი წლებიდან მოდის, როდესაც ხუდონჰესის გაჩერებამდე მივედით. მინდა გითხრათ, რომ დღეს რომ ხუდონჰესი აშენებული ყოფილიყო, ჩვენ გაცილებით უფრო ძლიერები ვიქნებოდით ეკონომიკურად", — განაცხადა ნათია თურნავამ.

ეკონომიკის მინისტრმა ახსნა, მისი აზრით, რატომ აქვს საზოგადოების ნაწილს უნდობლობა ჰესების მიმართ. ასევე, განმარტა, მისი ხედვით, რა სარგებლობა მოაქვს მათ მშენებლობას.

"არის ეს შიშები. ზოგი ირაციონალური შიში არის, ზოგი, დავუშვათ, გადმოცემით მოსმენილ ამბავზე დამყარებული შიში, ზოგი ახსოვთ ჯერ და მოდის მართლა წინა თაობებიდან. რა თქმა უნდა, ჩვენი ამოცანა არის და ჩვენი ვალდებულება არის, რომ მეტად ავხსნათ, რა საჭირო არის ჰესები, რა სიკეთე მოაქვთ ჰესებს და რა არის ალტერნატივა ჰესების.

ალტერნატივა არის შემდეგი — თუკი ჩვენ დღეს, არ მივიღებთ გადაწყვეტილებას, რომ აუცილებელი ჰიდროსადგურები, რომლებიც ახლა, ზოგი შეჩერებულია და ძალიან ბევრი მოსახლეობასთან გაუგებრობის გამო, არ დაიძვრება და მათ შორის დიდი ჰესები, როგორც არის მაგალითად ნამახვანი, ჩვენ უახლოეს 10 წელიწადში გავხდებით უპირატესად და კრიტიკულად დამოკიდებულები იმპორტზე, ელექტროენერგიის იმპორტზე", — აცხადებს ნათია თურნავა.

მეოთხე თვეა ნამახვანის ჰესის აშენებას ეწინააღმდეგება ადგილობრივი მოსახლეობა. ისინი ხეობიდან კომპანიის გასვლასა და მშენებლობის შეჩერებას მოითხოვენ. ადგილობრივების პროტესტს მხარს უჭერს არასამთავრობო ორგანიზიაციათა ნაწილი. მათი განცხადებით, სახელმწიფომ ისე გასცა ჰესის მშენებლობის ნებართვა, რომ მშენებელ კომპანიას საჭირო კვლევები და დოკუმენტები არ ჰქონდა წარმოდგენილი.

12 მარტს, ნათია თურნავამ განაცხადა, რომ არსებული კვლევების გადამოწმებამდე კაშხლისა და წყალსაცავის მშენებლობა არ დაიწყება. თუმცა ამბობ, რომ ეს გადაწყვეტილება მოსახლეობის ნდობის მოსაპოვებლად მიიღო და დარწმუნებულია, რომ ახალი აღმოჩენა არ იქნება.

გაიგეთ მეტი: