ნაციონალური მოძრაობის ერთ-ერთი ლიდერი, ხატია დეკანოიძე TV პირველზე სასამართლოს მიერ მიღებულ გადაწყვეტილებას ეხმაურება და ტელეკომპანიას სოლიდარობას უცხადებს.

"ანუ ძალით შევარდნას აპირებენ და ტვ პირველის ჩხრეკას? მართლა როგორ ბედავენ ამდენს? სოლიდარობა და თანადგომა ტვ პირველს!..", — წერს დეკანოიძე ფეისბუქგვერდზე.

სასამართლოს განკარგულების მიხედვით, თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

"საგამოძიებო მოქმედებების ჩამტარებელ პირს ან ორგანოს უფლება აქვს წინააღმდეგობის გაწევისას გამოიყენოს იძულების პროპორციული ზომა", — წერია განკარგულებაში.

კითხვით, მისცემენ თუ არა ჩანაწერებს პროკურატურას, On.ge ნოდარ მელაძეს დაუკავშირდა. მისი თქმით, ამისთვის პროკურატურამ შესაბამისი განჩინებით უნდა მიმართოს, ახლა კი "გაურკვეველ კონვერტს" და "ელექტრონულ მატარებელს" ითხოვს. მისივე თქმით, იურისტები უკვე ამზადებენ შესაბამის საპასუხო წერილს, რომელიც პროკურატურას გაეგზავნება.