თებერვალში მეგან მარკლის პირადი წერილების გასაჯაროების გამო დაწყებული სასამართლო დავა სასექსის ჰერცოგინიის სასარგებლოდ დასრულდა. 2019 წელს ბრიტანულმა ტაბლოიდმა, Mail on Sunday-მ მეგან მარკლის მამისადმი, ტომას მარკლისადმი მიწერილი წერილი გამოაქვეყნა. წერილის გასაჯაროების შემდეგ მეგანმა გამოცემას სასამართლოში უჩივლა.

მეგან მარკლმა ბრიტანული ტაბლოიდისგან $627 723-ის წინასწარ ანაზღაურების უფლება უკვე მოიპოვა. თანხის გარდა, სასამართლოს გადაწყვეტილებით, The Mail on Sunday-ს პირველ გვერდზე სასამართლო დავაში მეგან მარკლის გამარჯვების შესახებ განცხადების გამოქვეყნება მოუწევს. განცხადებაში აღნიშნული იქნება, რომ ტაბლოიდმა პირადი წერილის გამოქვეყნებით მეგან მარკლის საავტორო უფლება დაარღვია.

განცხადება Mail Online-ის მთავარ გვერდზეც გამოქვეყნდება. მეგან მარკლი მის 6 თვით გამოქვეყნებას ითხოვდა, თუმცა სასამართლოს გადაწყვეტილებით, განცხადება მთავარ გვერდზე 1 კვირის განმავლობაში დარჩება.

აღსანიშნავია, რომ მეგან მარკლმა სასამართლო ხარჯების, £1,5 მილიონის ($2 092 410) ანაზღაურება მოითხოვა. იგი, აგრეთვე, გაზეთის პირველ გვერდზე ბოდიშის წერილის გამოქვეყნებასა და სასამართლოს ბრძანებით, ტაბლოიდის მიერ წერილის ყველა ასლისა და მის შესახებ გაკეთებული ჩანაწერების გადმოცემასა და განადგურებას ითხოვს

პირადი ინფორმაციის გამოქვეყნებით უშუალოდ მეგან მარკლის უფლებების დარღვევის გამო ზიანის ანაზღაურების დაკისრების შესახებ სასამართლო გადაწყვეტილებას მოგვიანებით, აპრილში ან მაისში გამოიტანს. ბოდიშის წერილის გამოქვეყნების საკითხიც მოგვიანებით გადაწყდება.

ამავე თემაზე: