თბილისში, თავისუფლების მოედანზე მოქალაქეები კომენდანტის საათის გაუქმებას ითხოვენ. მათი განცხადებით, როცა ინფიცირების მაჩვენებელი 4%-ზე დაბალია და სხვა შეზღუდვებიც იხსნება, გაურკვეველია, რატომ რჩება ძალაში კომენდანტის საათი.

"ერთადერთი მოთხოვნა გვაქვს — დაუყოვნებლივ მოიხსნას კომენდანტის საათი, რომელიც არანაირ ლოგიკაში აღარ ჯდება. გვინდა საკოორდინაციო საბჭო შეიკრიბოს რაც შეიძლება მალე და ეს პოზიცია იყოს გამჭვირვალე. მოსახლეობის დაინტერესება ძალიან დიდი და გვინდა მოვისმინოთ არგუმენტი, რატომ არის 4%-ზე ნაკლები დადებითობის მაჩვენებლის შემდეგ გაგრძელებული ეს კომენდანტის საათი, როცა ვხედავთ, რომ ყველა შეზღუდვა მოხსნილია. ჯანმრთელობა მხოლოდ ფიზიკური ჯანმრთელობა არ არის და ფსიქოლოგიური და მენტალური ჯანმრთელობა ასევე ჯანმრთელობაა. რა რეკომენდაციებიც იყო, ყველაფერს ვითვალისწინებდით, მაგრამ როდესაც ყველა შეზღუდვა ნელ-ნელა იხსნება, კომენდანტის საათი დატოვებულია მართვის ბერკეტად, რასაც არც ერთი მოქალაქე არ დავუშვებთ", — ამბობს აქციის ერთ-ერთი ორგანიზატორი, ბებე სისიკაშვილი On.ge-სთან.

ფოტო: On.ge

კიდევ ერთი მოქალაქე აღნიშნავს, რომ როცა ყველა რეგულაცია მოხსნილია და ხალხს ისედაც აქვს ერთმანეთთან კომუნიკაცია, ასევე, "ნახევარ თბილისს საშვები აქვს და ჩვეულებრივად მოძრაობენ", გაუგებარია, რატომ ეზღუდებათ უფლებები სხვა მოქალაქეებს.

"აქ მოვედი იმისთვის, რომ გავაპროტესტო ადამიანის ფუნდამენტური უფლებების დარღვევა. ყოველი 9 საათის შემდეგ ქვეყანაში დიქტატურა იწყება და ამის არგაპროტესტება შემაწუხებს რამდენიმე წლის მერე, ამ პერიოდს რომ გავიხსენებ", — ამბობს აქციის კიდევ ერთი მონაწილე.

ფოტო: On.ge

თავისუფლების მოედანზე მივიდნენ სირცხვილიას აქტივისტებიც. შოთა დიღმელაშვილის თქმით, კომენდანტის საათი არ არის ჯანმრთელობაზე ზრუნვა და ხელისუფლება მას ძალაში პოლიტიკური მიზნებით ტოვებს.

"ვაპროტესტებთ კომენდანტის საათს, რომელიც უკვე იმისთვის არის დატოვებული, რომ პროტესტს შეეშალოს ხელი და არა კორონას გავრცელებას. ტრანსპორტი რომ გახსნილია, პიკის საათი ახლოვდება, გადაჭედილ ტრანსპორტში რანაირად ხდება [რეკომენდაციების დაცვა]. მეცნიერულ საფუძველს გამოცდილია, კი მოჰყავთ სხვა ქვეყნების მაგალითები, მაგრამ იქ არის კომპლექსურად გააზრებული და არც იქ არ ნიშნავს კომენდანტი იმას, რომ ძაღლის გასეირნება არ შეგიძლია ან დარღვევა, რეგისტრირდები ჩვეულებრივად. მეორე — ეს კომენდანტის საათის არის არაკონსტიტუციური, შეკრებისა და გამოხატვის თვისუფლებას არ უნდა კრძალავდნენ", — ამბობს დიღმელაშვილი.

ფოტო: On.ge

საქართველოს დიდ ქალაქებში ღამის საათებში გადაადგილება 4 თვის წინ, 2020 წლის 9 ნოემბრიდან შეიზღუდა.